Foto: «Alataý» teatrynyń baspasóz qyzmeti
«Alataý» dástúrli óner teatrynda «Úshqońyr» tobynyń «Uly elim» atty shyǵarmashylyq keshi ótti, dep habarlaidy Ult.kz.
«Úshqońyr» triosy alǵash Qaskeleń aýdandyq mádeniet úiiniń janynan qurylǵan «Úshqońyr» folklorly-etnografiialyq án-kúi ansambliniń ánshilerinen quralǵan bolatyn. Aisáýle Qaiyrǵazina, Nariman Abdrahmanov, Erǵali Aǵaidarov osy óner ujymynyń alǵashqy negizin qalaǵan ónerpazdary.
Toptyń negizgi ustanymy – halyq ánderi men halyq kompozitorlary jáne keiingi kompozitorlardyń ánderin qaimaǵyn buzbai, saf qalpynda tyńdarmanǵa usyný.
Bizge jetken halqymyzdyń án murasy óziniń erekshe iirimderimen jan dúniemizdi baýrap alady. Ásirese, bizdiń qazaqtyń ánge degen qushtarlyǵy, ánge etene jaqyndyǵy tipti ala-bóten ǵoi. Solai bolatyn jóni de bar. Óitkeni qazaq ánmen egiz jaratylǵan.
Foto: «Alataý» teatrynyń baspasóz qyzmeti
«Úshqońyr» triosynyń repertýary da keń aýqymdy qamtyǵan. Ǵasyrlardan tamyr tartqan, ulttyń bolmysyn aiqyndaityn halyq ánderi men halyq kompozitorlary Aqan seri, Birjan sal, Muhit, Úkili Ybrai syndy dástúrli án óneriniń negizi bolǵan Arqa, Jetisý, Batys mektebin qamtidy. Sonymen qosa HH ǵasyrdyń ekinshi jartysynda qazaq án ónerin jańasha túrlendirgen ánder «Úshqońyrdyń» oryndaýynda keremet naqyshqa ie bolyp, tyńdarmannyń júregine jol taýyp keledi. Nurǵisa Tilendiev, Temirjan Bazarbaev, Shámshi Qaldaiaqov, Áset Beiseýov, Mansur Saǵatov syndy teńdesiz kompozitorlardyń shyǵarmalary toptyń negizgi repertýarynda.
Dáýir ótip ýaqyt ozǵan saiyn, biz bolashaqqa kósh túzegen qazaq án kerýenimen birge sapar shegip kelemiz. Bul kúnde «Alataý» dástúrli óner teatrynda kórermenderine qaltyqsyz qyzmet etip júrgen Nariman, Aisáýle, Erǵali da án aityp qoimai ózderiniń akterlik qyrlarymen de tanylyp keledi. Daryndy ul-qyzdaryńyz teatr sahnasynda ózindik orny men qoltańbasy bar artister bolyp qalyptasty.
Shákirtterin quttyqtap Qazaqstannyń Halyq ártisi Ramazan Stamǵazy, Qazaqstannyń eńbek sińirgen qairatkerleri Erkin Shúkiman men Aigúl Qosanovalar kelip, ózderiniń júrekjardy tilekterin aityp, ánmen shashý shashty.
Foto: «Alataý» teatrynyń baspasóz qyzmeti
Halqyn ásem ánmen sýsyndatqan dúl-dúl ánshiler án kerýeniniń sándi saltanaty. Oryndaýshysyn tapqan án tyńdaýshynyń júregine jeteri anyq. Al ándi naqyshyna keltire bilgen ánshi qashanda halqynyń ystyq yqylasy men qurmet-qoshemetine bólengen. «Úshqońyr» triosynyń shyǵarmashylyq keshi tyńdarmannyń kóńilinen shyqqan erekshe kesh boldy.
Ardaq Orazǵaliuly
