Búgin Resei astanasyndaǵy Kreml saraiynda qazaqstandyq ánshilerdiń qatysýymen Resei men Tatarstannyń halyq ártisi Renat Ibragimovtyń mereitoilyq kontserti ótedi, dep habarlaidy "Ult aqparat" QazAqparat agenttigine silteme jasap.
Kontsertte Roza Rymbaeva men tanymal ánshi Erjan Nurǵaliev jáne Renat Ibragimov triosy Memleket basshysy Nursultan Nazarbaevtiń sózine jazylǵan «Úshqońyr» ánin shyrqaityny belgili boldy.
Sondai-aq, «Po moriý jizni» dep atalatyn avtobiografiialyq kitap jelisiniń negizinde daiyndalǵan merekelik baǵdarlamaǵa áigili ánshiniń alys jáne shaqyn sheteldegi dostary men áriptesteri qatysady.
Olardyń arasynda Aleksandra Pahmýtova, Marat Basharov, Olga Kabo, Evgenii Voskresenskii, Roza Rymbaeva, Anatolii Iarmolenko («Siabry»), Farýh Zakirov («Ialla»), Dina Garipova, Mari Karne, Margarita Pozoian, Erjan Nurǵaliev, Ksana Sergienko, «Tenora HHI veka» ujymy, Kazan World jáne basqa da kóptegen ánshiler bar.
Jýyrda atalǵan kontsertke qatysýshylar erekshe quttyqtaý jasady. Ánshilerdiń barlyǵy qosylyp Renat Ibragimovtyń alǵashqy «Nash gorod» ánin oryndaǵan edi.
Aýqymdy kontsert búgin keshke Kreml saraiynda ótedi. Án keshin Tatarstan Respýblikasynyń kameralyq hory men RF FQQ Ortalyq shekara ansambli súiemeldeidi.
