Foto: baigenews.kz
Eýropalyq Odaqtyń sanktsiialar jónindegi arnaiy ókili Devid O'Sallivan Qazaqstannyń Resei-Ýkraina jaǵdaiyna bailanysty janama sanktsiiaǵa iligý yqtimaldyǵy týraly pikir bildirdi, dep habarlaidy QazAqparat.
«Biz úshinshi elderge sanktsiia salmaimyz. Shetin jaǵdailarda belgili bir kompaniialarǵa olardyń sanktsiiany ainalyp ótýge kómekteskeni dáleldense, sanktsiia salýymyz múmkin. Qazirgi tańda qolymyzda jetkilikti egei-tegjeili málimet joq. Ondai aqparat bolǵanda qandai da bir kompaniia sanktsiiany ainalyp ótýge shynymen de kómektesip júr me, sony anyqtai alar edik. Qazir biz qolymyzda bar materialdardyń bárin tekserip jatyrmyz. Qazirgi eń negizgi maqsatymyz – naqty, senimdi aqparat alý. Bul baǵytta Qazaqstan biligimen birge jumys istep jatyrmyz», - dedi ol Eýropalyq Odaqtyń Astanadaǵy ókildiginiń keńsesinde ótken baspasóz konferentsiiasynda.
Sondai-aq, ol qazirgi geosaiasi jaǵdaidaǵy ár eldiń áreketi erteńgi repýtatsiiasyn anyqtaitynyn aitty.
«Eýropa elderine qosylmaǵan, biraq G-7 elderimen áriptestikti jalǵastyrǵysy keletin elderge kelsek, bul – repýtatsiia máselesi. Eger qandai da bir eldiń sanktsiialardy ainalyp ótýge tuǵyr bolyp otyrǵany dáleldense, bul ózge kompaniialar úshin salqyn qatynas áserin týyndatýy múmkin. Kompaniialar mundai eldiń kompaniialarymen istes bolýǵa asa qulyqty bolmaidy. Óitkeni, ózderi sanktsiiaǵa túsip qalýy múmkin jáne ol týraly jaqsy biledi», - dedi arnaiy ókil.
