Almatyda QR Premer-Ministriniń orynbasary Roman Skliardyń qatysýymen baspasóz máslihaty ótti, dep habarlaidy "Ult aqparat".
Roman Skliar ushaq apatynyń yqtimal sebepterin atady. «Ushaq apatynyń sebepteriniń aldyn ala nusqalaryn aitar bolsam, ushaq ushý kezinde eki ret quiryq tusymen ushý jolaǵyna soqtyqqan. Bul ushqyshtyń qateliginen bolýy múmkin. Tehnikalyq sebepterdi Halyqaralyq aviatsiia komissiiasy anyqtaityn bolady. 2019 jyldan bergi osy ushaqtyń qatysymen bolǵan oqiǵalardyń barlyǵy taldaýdan ótkiziledi. Qara jáshik te tek HAK mamandarynyń qatysýymen oqylatyn bolady», - dedi Roman Skliar.
Onyń aitýynsha, ushaq apatynan zardap shekkender men qaza bolǵandardyń otbasylaryna kómek kórsetiledi.
«Ótemaqy máselesine kelsek, Úkimet ótemaqy berý tártibin bekitken soń barlyq jolaýshylarǵa kómek beriledi. Bireýi de nazardan tys qalmaidy», - dedi ol.
«Apatqa ushyraǵan Bek Air ushaǵy boiynsha myńǵa tarta qutqarýshy men 72 tehnika jumyldyryldy. 33 jedel járdem brigadasy kómek kórsetti. Anyqtalǵan aqparatqa sáikes, ushaqta 93 jolaýshy men 5 ekipaj múshesi bolǵan. Jolaýshylardyń ishinde ekeýi Ýkraina azamaty, bireýi Qyrǵyzstan azamaty bolsa, taǵy bireýi QHR azamaty, qalǵany Qazaqstan azamattary. Oqiǵa saldarynan 12 adam kóz jumdy. Olardyń segizi oqiǵa ornynda, al qalǵan ekeýi aýrýhanada, taǵy ekeýi Almaty áýejaiynda qaitys boldy. Almatynyń ártúrli aýrýhanalary men emhanalaryna 49 adam jetkizildi. Olardyń 18-i aýyr jaǵdaida jatyr», - dedi dedi Roman Skliar Almatyda shuǵyl ótken baspasóz máslihatynda.
