Almaty mańyndaǵy ushaq apatynan 4-5, 8 jáne 9 ailyq úsh sábi zardap shekken, dep habarlaidy "Ult aqparat".
Áleýmettik jelide qutqarýshylardyń 4-5 ailyq náresteni qiraǵan salonnan alyp shyqqany beinelengen video tarady. Bul kórinis kópshiliktiń kóńilin bosatty.
Kórer jaryǵy bar balanyń ata-anasy tiri me, joq pa? Osy saýal jurttyń kókeiinde tur.
Qalalyq qoǵamdyq densaýlyq saqtaý basqarmasynyń taratqan málimetine sáikes, aýrýhanaǵa bir jasqa deiingi 3 bala túsken. Dárigerler úsheýiniń de ata-anasy tiri ekenin aitty.
Biraq olardyń árqaisysy ár aýrýhanaǵa jetkizilgen.
Mamandardyń aitýynsha, videoda politsiia qyzmetkeri kóterip bara jatqan 9 ailyq ul bala - Ǵatiat Ádiljan Maqsutuly.
Bul bala mi jaraqatymen túsken. Ishi, ishki organdary soqqy alǵan. Jaǵdaiy birqalypty. Al onyń ákesi 27 jastaǵy Ǵatiat Maqsut Bolatqanuly bas jaraqatymen shuǵyl meditsinalyq qyzmet kórsetý aýrýhanasyna jatqyzyldy.
Al anasy 27 jastaǵy Ǵatiat Aisulý Erqanatqyzy kishi jambastaǵy urshyq býynynyń soqqysy, bel omyrtqasynyń jaraqaty diagnozymen tústi.
Odan bólek bul apatta 5 ailyq jáne 8 ailyq taǵy eki náreste jaraqat alǵan.
Shamamen 4-5 ailyq náresteniń aty – Asylym Aqbolatqyzy.
Qyz balanyń miy jaraqattanyp, soqqy alǵan. Balanyń eńbegi urylyp, syrylǵan. Dárigerler balanyń jaǵdaiyn birqalypty aýyr dep baǵalap otyr.
Sábidiń ata-anasy Almaty oblystyq kópsalaly aýrýhanasynda jatyr.
Anasy 28 jastaǵy Sáttigúl Úsenge jaraqattan keiingi pnevmotoraks diagnozy qoiylǵan. Oń jaq san súiegi, jambas súiegi jáne oń jaqtaǵy 9-shy qabyrǵasy synǵan. Qazir jaǵdaiy birqalypty.
Asylymnyń ákesi 32 jastaǵy Davaa Aqbolat mi jaraqatymen aýrýhanaǵa tústi. Onyń da jaǵdaiyn dárigerler birqalypty dep baǵalap otyr.
Ushaq apatynan 8 ailyq Quralbai Dámeli de zardap shekti.
Bala qosarly jaraqatpen túsken, miy jaraqat alǵan, miy shaiqalǵan. Ishi, ishki organdary soqqy alǵan. Jaǵdaiy aýyr.
Onyń ákesi - 39 jastaǵy Nurlan Tólebaev №4 aýrýhanada jatyr. Jabyq mi jaraqatymen túsken. Miy shaiqalyp, keýde tusy soǵylǵan. Jaǵdaiy óte aýyr.
