Almaty túbinde apatqa ushyraǵan «Bek Eir» áýe kompaniiasynyń ushaǵyna qatysty kúni buryn tujyrym jasaý durys emes. Mundai pikirdi Ortalyq kommýnikatsiialar qyzmetindegi baspasóz máslihatynda QR Indýstriia jáne infraqurylymdyq damý vitse-ministri Berik Kamaliev bildirdi, dep habarlaidy "Ult aqparat" QazAqparat agenttigine silteme jasap.
«Qalai desek te, ushaq nelikten qulady? Táýlikke jýyq ýaqyttyń ishinde biz jumysta otyryp kúni-túni rejimde sarapshylardyń túrli pikirlerin estimiz. Sizderdi Prezidenttiń, Premer-Ministrdiń tapsyrmasy bar ekendigine sendirgim keledi. Komissiia jumys istep jatyr, Memlekettik komissiianyń barlyq músheleri keshe birden Almatyǵa ushyp ketti. Barlyǵy jumyldyryldy, jedel tergeý toby bar. Sondyqtan, menińshe, kúni buryn qandai da bir tujyrym jasaý durys emes. Kútý qajet», - dedi vitse-ministr BAQ ókilderiniń saýalyna orai.
Osy oraida ol búgin keshki saǵat 18:40-ta Almatyǵa Máskeýden halyqaralyq sarapshy ushyp keletindigin aitty.
«Erteń inspektorymyzben birge qara jáshikti Máskeýge jiberemiz. Aldyn ala túsiniktemeler men sarapshylardyń pikirleri kedergi keltirip qana qoimai, halyqqa aqparatty belgili bir deńgeide teris jetkizetindigin de atap ótkim keledi», - dedi Berik Kamaliev.
