QR Premer-Ministri Asqar Maminniń tóraǵalyǵymen «Bek Air» áýe kompaniiasynyń ushaǵynyń qulaý sebepterin tergeý boiynsha Úkimettik komissiianyń otyrysy ótkizildi, dep habarlaidy "Ult aqparat" primeminister.kz saityna silteme jasap.
«Almaty oblysyndaǵy ushaq apaty barlyq qazaqstandyqtar úshin asa qaiǵyly habar boldy. Ókinishke orai, adamdar qaza tapty, zardap shekkender kóp», — dedi A. Mamin.
Úkimet basshysy qaza tapqandardyń týǵan-týystary men jaqyndaryna kóńil aitty, al zardap shekkenderge tezirek saýyǵýdy tiledi.
Memleket basshysy Qasym-Jomart Toqaevtyń tapsyrmasy boiynsha qurylǵan Úkimettik komissiia jumysynyń aldyn ala nátijeleri týraly QR Premer-Ministriniń orynbasary R. Skliar, sotqa deiingi tergeý amaldary jáne oqiǵa ornynda júrgizilip jatqan jumystar týraly ishki ister ministri E. Turǵymbaev, zardap shekkenderdiń jaǵdaiy týraly densaýlyq saqtaý ministri E. Birtanov baiandady.
Aǵymdaǵy jyly 27 jeltoqsanda tańǵy saǵat 07:21-de «Bek Air» áýe kompaniiasynyń №Z2100 reisi, «Almaty – Nur-Sultan» baǵyty boiynsha ushyp shyqqan Fokker-100 ushaǵy áýege kóterilý kezinde tómen quldilap, beton qorshaýdy buzyp ótken. Almaty qalasynyń Qazaeronavigatsiia baiandamasy boiynsha, saǵat 07:22-de ushaqtyń áýege kóterilýi kezinde dispetcherler ushqyndardy baiqaǵan. Radar ekranynan ushaq belgisi joǵalyp ketken. Dabyl qaǵylǵan.
Saǵat 08:04-te Almaty qalasynyń Tótenshe jaǵdailar departamenti ushý jolaǵynan 1,8 shaqyrym qashyqtyqtaǵy Almaty oblysy Talǵar aýdany Gúldala aýylynyń shetinde ashyq aýmaqta Fokker-100 ushaǵynyń qulaǵanyn anyqtady.
Ushaq Almatydan ushqan kezde áýe kemesiniń bortynda 98 adam bolǵan, onyń ishinde 9-y – bala jáne 5-eýi – ekipaj músheleri.
15:00 jaǵdai boiynsha oqiǵa saldarynan barlyǵy 12 adam qaza tapqan, Almaty qalasynyń túrli meditsinalyq mekemelerine 53 adam jetkizilgen, onyń ishinde 8 adamnyń jaǵdaiy asa aýyr dep baǵalanýda.
Nur-Sultan qalasynan sanitarlyq aviatsiia bortymen jetekshi respýblikalyq meditsinalyq ortalyqtardyń mamandary ushyp bardy, onyń ishinde Ulttyq neirohirýrgiia ortalyǵynyń jáne Travmatologiia jáne ortopediia ǴZI mamandary bar.
Almaty qalasy men Almaty oblysynyń meditsinalyq uiymdary qajetti meditsinalyq kómekti kórsetip jatyr, dári-dármekpen jáne qajetti qanmen tolyq qamtamasyz etilgen. Zardap shekkendermen jáne qaza tapqandardyń otbasylarymen psihologtar jumys isteýde.
«Memleket basshysynyń tapsyrmasymen ushaq apatynan qaza tapqandardyń otbasylaryna 4 mln teńgeden qarajat bólinedi. Sonymen qatar, barlyq zardap shegýshilerge qajetti qarjylai kómek kórsetiledi», — dedi A. Mamin.
Premer-Ministr Ishki ister ministrligine «Bek Air» áýe kompaniiasynyń ushaǵynyń qulaýyna bailanysty tolyq sotqa deiingi tergeý jumystaryn júrgizýdi, Densaýlyq saqtaý ministrligine zardap shegýshilerdiń tezirek saýyǵyp shyǵýy úshin barlyq sharalardy qabyldaýdy tapsyrdy.
«Apat sebepterin tergeý jónindegi Úkimettik komissiia 2020 jyldyń 10 qańtaryna qarai óz jumystarynyń aldyn ala qorytyndylaryn usynýy tiis», — dep naqtylady A. Mamin.
Aita keteiik, búgin tańda Almatydan Nur-Sultan qalasyna ushyp shyqqan ushaq radardan joǵalyp ketti.
Keiin 95 jolaýshysy jáne 5 ekipaj múshesi bar ushaqtyń apatqa ushyraǵany málim boldy.
Oqiǵanyń mán-jaiyn anyqtaý úshin ushaq qulaǵan aýmaqqa arnaiy komissiia ushyp shyqty.
QR Prezidenti Qasym-Jomart Toqaev ushaq apatyna kináliler zańǵa sáikes qatań jazalanatynyn málimdedi.
Elbasy Nur-Sultan Nazarbaev jolaýshylar ushaǵynyń apatqa ushyraýyna bailanysty kóńil aitty.
