Almaty túbinde «Bek Eir» ushaǵynyń apatqa ushyraýyna bailanysty bilet baǵasynyń kóterilgendigi týraly aqparat shyndyqqa janaspaidy. Bul týraly búgin Ortalyq kommýnikatsiialar qyzmetindegi baspasóz máslihatynda QR Indýstriia jáne infraqurylymdyq damý vitse-ministri Berik Kamaliev aitty, dep habarlaidy "Ult aqparat".
Onyń dereginshe, 2019 jylǵy 27-31 jeltoqsan kúnderi aralyǵyna josparlanǵan áýe kompaniiasynyń 100-ge jýyq reisi oryndalmaidy. Bul baǵyttarǵa barlyǵy 9157, onyń ishinde 8180 eresek, 765 bala, 212 náreste bileti satylǵan.
«Qazirgi ýaqytta áýe kompaniiasy 2019 jyldyń 31 jeltoqsanyna deiin josparlanǵan barlyq reisterdiń aviabiletteriniń tolyq qunyn qaitarý jumystaryn júrgizip jatyr. 2020 jyldyń 3-10 qańtary aralyǵyndaǵy «Bek Eir» áýe kompaniiasy reisteriniń jolaýshylar sany 9785 adamdy quraidy. 1-2 qańtarǵa áýe kompaniiasy ushýlardy josparlamaǵan. Oryndalmaityn reisterdiń jolaýshylaryna ózge áýe kompaniialarmen ushýdy usynamyz. Bul rette «Bek Eir» reisteriniń oryndalmaýyna bailanysty aviabiletterdiń baǵasy kóterilgen joq jáne kóterilmeidi de. Tarifterdiń kóterilgendigi týraly aqparat shyndyqqa janaspaidy», - dedi Berik Kamaliev.
Sonymen qatar vitse-ministr Jańa jyl meiramy qarsańynda jáne demalys kúnderi ádette aviabiletterdiń quny jai kúnderge qaraǵanda joǵary bolatyndyǵyn aitty.
