Qazaqstan Prezidenti Qasym-Jomart Toqaev Sriwijaya Air ushaǵynyń apatynan qaza bolǵandarǵa bailanysty Indoneziia Prezidenti Djoko Vidodaǵa Qazaqstan halqynyń jáne óz atynan kóńil aitý jedelhatyn joldady, dep habarlaidy "Ult aqparat" Aqordaǵa silteme jasap.
«Jantúrshigerlik apatta jaqyndarynan airylǵan otbasylardyń aýyr qaiǵysyna ortaqpyn. Jaratýshy olardyń qaiǵylaryn jeńildetip, qazaǵa ushyraǵandardyń janyn óziniń meiirimimen jarylqasyn», – delingen jedelhatta.
Eske salaiyq, keshe Indoneziiada Sriwijaya Air áýe kompaniiasynyń jolaýshylar ushaǵy apatqa ushyrady.
Indoneziia úkimetiniń málimetinshe, bortta 65 adam bolǵan, onyń 53-i jolaýshy (10 bala) jáne 12 ekipaj múshesi. Boeing 737-524 ushaǵy Jakartadan ushyp shyqqannan soń 4 minýttan keiin teńizge qulaǵan.
2018 jyly Jakartada taǵy bir ushaq apaty bolǵan edi. Lion Air áýe kompaniiasyna tiesili Boeing 737 MAX 8 áýe kemesi teńizge qulap, borttaǵy 189 adam qaza tapty.
