Almaty túbinde «Bek Air» ushaǵynyń apatqa ushyraýy saldarynan zardap shekken 3 adam aýrýhanadan shyqty, dep habarlaidy QazAqparat.
«Ótken táýlikte 3 adam aýrýhanadan shyqtyq. Klinikalarda 46 patsient, onyń ishinde 9 bala qalyp otyr. Balalardyń jaǵdaiy turaqty, olar reanimatsiia bólimshesinen aýystyryldy. Ómirlerine esh qaýip tónip turǵan joq. Degenmen tiisinshe sapaly em qajet. Jaǵdaidy ministrlik baqylaýda ustap otyr», - dedi Úkimet otyrysynan keiin BAQ ókilderine suhbat bergen QR Densaýlyq saqtaý ministri Eljan Birtanov.
Onyń dereginshe, birneshe adamnyń jaǵdaiy óte aýyr bolǵandyqtan reanimatsiia bólimshesinde jatyr.
«№4 qalalyq aýrýhanada 7 adam, Almaty oblystyq klinikalyq aýrýhanada 2 adam reanimatsiia bólimshelerinde jatyr. Bir patsienttiń ómirine qaýip tónip tur. Qazirgi ýaqytta ol jerde ǵylymi ortalyqtardyń basshylary jetekshilik jasaityn top jumys istep jatyr. Keshe keńes ótkizip, emdeý ádisin anyqtady. Jalpy, emdeý tolyq kólemde júrgizilip jatyr», - dedi Eljan Birtanov.
Sonymen qatar, ol ushaqtyń ekinshi ushqyshynyń jai-kúii jaiynda da derektermen bólisti.
«Jaǵdaiy óte aýyr bolǵanymen turaqty. Reanimatsiiada jatyr», - dedi ol.
Atap ótsek, qaiǵyly oqiǵa 27 jeltoqsan tańerteń boldy. Bek Air áýe kompaniiasynyń "Almaty – Nur-Sultan" baǵytyndaǵy Fokker 100 ushaǵy Almaty mańyna qulady.
Ushaqta 93 jolaýshy men 5 ekipaj múshesi bolǵan. Apat 12 adamnyń ómirin qidy, qaza bolǵandardyń ishinde ushaq komandiri bar. Ekinshi ushqysh qazir aýrýhanada jansaqtaý bóliminde jatyr.
Prezident tapsyrmasymen Premer-ministr jetekshilik etetin komissiia quryldy. Toqaev apattyń sebebin anyqtap, kinálilerdi qatań jazalaýdy tapsyrdy. 28 jeltoqsan elimizde jalpyulttyq aza tutý kúni bolyp jariialandy.
