الماتى تٷبٸندە «Bek Air» ۇشاعىنىڭ اپاتقا ۇشىراۋى سالدارىنان زارداپ شەككەن 3 ادام اۋرۋحانادان شىقتى, دەپ حابارلايدى قازاقپارات.
«ٶتكەن تەۋلٸكتە 3 ادام اۋرۋحانادان شىقتىق. كلينيكالاردا 46 پاتسيەنت, ونىڭ ٸشٸندە 9 بالا قالىپ وتىر. بالالاردىڭ جاعدايى تۇراقتى, ولار رەانيماتسييا بٶلٸمشەسٸنەن اۋىستىرىلدى. ٶمٸرلەرٸنە ەش قاۋٸپ تٶنٸپ تۇرعان جوق. دەگەنمەن تيٸسٸنشە ساپالى ەم قاجەت. جاعدايدى مينيسترلٸك باقىلاۋدا ۇستاپ وتىر», - دەدٸ ٷكٸمەت وتىرىسىنان كەيٸن باق ٶكٸلدەرٸنە سۇحبات بەرگەن قر دەنساۋلىق ساقتاۋ مينيسترٸ ەلجان بٸرتانوۆ.
ونىڭ دەرەگٸنشە, بٸرنەشە ادامنىڭ جاعدايى ٶتە اۋىر بولعاندىقتان رەانيماتسييا بٶلٸمشەسٸندە جاتىر.
«№4 قالالىق اۋرۋحانادا 7 ادام, الماتى وبلىستىق كلينيكالىق اۋرۋحانادا 2 ادام رەانيماتسييا بٶلٸمشەلەرٸندە جاتىر. بٸر پاتسيەنتتٸڭ ٶمٸرٸنە قاۋٸپ تٶنٸپ تۇر. قازٸرگٸ ۋاقىتتا ول جەردە عىلىمي ورتالىقتاردىڭ باسشىلارى جەتەكشٸلٸك جاسايتىن توپ جۇمىس ٸستەپ جاتىر. كەشە كەڭەس ٶتكٸزٸپ, ەمدەۋ ەدٸسٸن انىقتادى. جالپى, ەمدەۋ تولىق كٶلەمدە جٷرگٸزٸلٸپ جاتىر», - دەدٸ ەلجان بٸرتانوۆ.
سونىمەن قاتار, ول ۇشاقتىڭ ەكٸنشٸ ۇشقىشىنىڭ جاي-كٷيٸ جايىندا دا دەرەكتەرمەن بٶلٸستٸ.
«جاعدايى ٶتە اۋىر بولعانىمەن تۇراقتى. رەانيماتسييادا جاتىر», - دەدٸ ول.
اتاپ ٶتسەك, قايعىلى وقيعا 27 جەلتوقسان تاڭەرتەڭ بولدى. Bek Air ەۋە كومپانيياسىنىڭ "الماتى – نۇر-سۇلتان" باعىتىنداعى Fokker 100 ۇشاعى الماتى ماڭىنا قۇلادى.
ۇشاقتا 93 جولاۋشى مەن 5 ەكيپاج مٷشەسٸ بولعان. اپات 12 ادامنىڭ ٶمٸرٸن قيدى, قازا بولعانداردىڭ ٸشٸندە ۇشاق كومانديرٸ بار. ەكٸنشٸ ۇشقىش قازٸر اۋرۋحانادا جانساقتاۋ بٶلٸمٸندە جاتىر.
پرەزيدەنت تاپسىرماسىمەن پرەمەر-مينيستر جەتەكشٸلٸك ەتەتٸن كوميسسييا قۇرىلدى. توقاەۆ اپاتتىڭ سەبەبٸن انىقتاپ, كٸنەلٸلەردٸ قاتاڭ جازالاۋدى تاپسىردى. 28 جەلتوقسان ەلٸمٸزدە جالپىۇلتتىق ازا تۇتۋ كٷنٸ بولىپ جارييالاندى.
