Áýe apatynda jaraqat alǵan UQK qyzmetkerleriniń jaǵdaiy áli aýyr. Bul týraly №4 qalalyq klinikalyq aýrýhananyń bas dárigeri Saǵi Beisenbekov pen qalalyq qoǵamdyq densaýlyq saqtaý basqarmasynyń ókili Laýra Myrzaǵali onlain brifing barysynda málim etti, dep habarlaidy "Ult aqparat".
«Jaǵdailary turaqty aýyr. Qarqyndy terapiia jaǵdaiynda baqylaýda. Densaýlyqtaryn jaqsartý úshin barlyq qajetti sharalar qabyldanýda», - dedi №4 qalalyq klinikalyq aýrýhananyń bas dárigeri Saǵi Beisenbekov.
Zardap shekkenderdiń densaýlyǵy týraly Almaty qalalyq qoǵamdyq densaýlyq saqtaý basqarmasynyń ókili, telemeditsina ortalyǵynyń basshysy Laýra Myrzaǵali da túsinikteme berdi.
«Olardyń ómirin saqtap qalý úshin dárigerler baryn salýda. Qazir olardyń jaǵdaiy turaqty aýyr. Ekeýi de №4 qalalyq klinikalyq aýrýhanada jatyr. Alǵashqy kúnnen bastap bizdiń dárigerler olarǵa qajetti meditsinalyq kómek kórsetýde», - dedi spiker brifing barysynda.
Eske sala keteiik, 13 naýryz kúni Nur-Sultan-Almaty baǵytynda kele jatqan AN-26 áskeri ushaǵy 17.22 kezinde radardan joǵalyp, qala áýejaiy mańynda apatqa ushyraǵan edi.
Ushaqta bolǵan 4 adam qaza tapty. 2 adam túrli jaraqatpen Almaty qalasynyń №4 qalalyq klinikalyq aýrýhanasyna jetkizildi.
Ushaq apaty bolǵan jerge qala ákimi Baqytjan Saǵyntaev baryp, zardap shekkenderge barynsha kómek kórsetýdi tapsyrdy.
Sonymen qatar, Memleket basshysy áýe apatynyń sebepterin anyqtaýdy tapsyrǵan bolatyn.
Qazaqstan Respýblikasy Ulttyq qaýipsizdik komiteti Almatyda apatqa ushyraǵan ushaqtyń qara jáshigindegi derekter tekserilip jatqandyǵyn málim etti.
