ەۋە اپاتىندا جاراقات العان ۇقك قىزمەتكەرلەرٸنٸڭ جاعدايى ەلٸ اۋىر. بۇل تۋرالى №4 قالالىق كلينيكالىق اۋرۋحانانىڭ باس دەرٸگەرٸ ساعي بەيسەنبەكوۆ پەن قالالىق قوعامدىق دەنساۋلىق ساقتاۋ باسقارماسىنىڭ ٶكٸلٸ لاۋرا مىرزاعالي ونلاين بريفينگ بارىسىندا مەلٸم ەتتٸ, دەپ حابارلايدى "ۇلت اقپارات".
«جاعدايلارى تۇراقتى اۋىر. قارقىندى تەراپييا جاعدايىندا باقىلاۋدا. دەنساۋلىقتارىن جاقسارتۋ ٷشٸن بارلىق قاجەتتٸ شارالار قابىلدانۋدا», - دەدٸ №4 قالالىق كلينيكالىق اۋرۋحانانىڭ باس دەرٸگەرٸ ساعي بەيسەنبەكوۆ.
زارداپ شەككەندەردٸڭ دەنساۋلىعى تۋرالى الماتى قالالىق قوعامدىق دەنساۋلىق ساقتاۋ باسقارماسىنىڭ ٶكٸلٸ, تەلەمەديتسينا ورتالىعىنىڭ باسشىسى لاۋرا مىرزاعالي دا تٷسٸنٸكتەمە بەردٸ.
«ولاردىڭ ٶمٸرٸن ساقتاپ قالۋ ٷشٸن دەرٸگەرلەر بارىن سالۋدا. قازٸر ولاردىڭ جاعدايى تۇراقتى اۋىر. ەكەۋٸ دە №4 قالالىق كلينيكالىق اۋرۋحانادا جاتىر. العاشقى كٷننەن باستاپ بٸزدٸڭ دەرٸگەرلەر ولارعا قاجەتتٸ مەديتسينالىق كٶمەك كٶرسەتۋدە», - دەدٸ سپيكەر بريفينگ بارىسىندا.
ەسكە سالا كەتەيٸك, 13 ناۋرىز كٷنٸ نۇر-سۇلتان-الماتى باعىتىندا كەلە جاتقان ان-26 ەسكەري ۇشاعى 17.22 كەزٸندە راداردان جوعالىپ, قالا ەۋەجايى ماڭىندا اپاتقا ۇشىراعان ەدٸ.
ۇشاقتا بولعان 4 ادام قازا تاپتى. 2 ادام تٷرلٸ جاراقاتپەن الماتى قالاسىنىڭ №4 قالالىق كلينيكالىق اۋرۋحاناسىنا جەتكٸزٸلدٸ.
ۇشاق اپاتى بولعان جەرگە قالا ەكٸمٸ باقىتجان ساعىنتاەۆ بارىپ, زارداپ شەككەندەرگە بارىنشا كٶمەك كٶرسەتۋدٸ تاپسىردى.
سونىمەن قاتار, مەملەكەت باسشىسى ەۋە اپاتىنىڭ سەبەپتەرٸن انىقتاۋدى تاپسىرعان بولاتىن.
قازاقستان رەسپۋبليكاسى ۇلتتىق قاۋٸپسٸزدٸك كوميتەتٸ الماتىدا اپاتقا ۇشىراعان ۇشاقتىڭ قارا جەشٸگٸندەگٸ دەرەكتەر تەكسەرٸلٸپ جاتقاندىعىن مەلٸم ەتتٸ.
