Memleket basshysynyń tapsyrmasymen QR IIM Almaty oblysy Gúldala aýylynyń aýmaǵynda «Fokker-100» jolaýshylar áýe kemesiniń apatqa ushyraý faktisi boiynsha QR Qylmystyq kodeksiniń 344-babynyń 3-bóligine sáikes sotqa deiingi tergeý júrgizýde, dep habarlaidy "Ult aqparat" vedomstvonyń baspasóz qyzmetine silteme jasap.
«IIM ushaqtyń apatqa ushyraýyna ákep soqqan sebepter men jaǵdailardy sapaly jáne obektivti tekserý júrgizedi. Tergeý barysynda barlyq qujattar, aýdio jáne beinejazbalar zertteledi. Áýe kemesiniń jai-kúiine birqatar saraptama, onyń ishinde órt-tehnikalyq jáne kóliktik - trassologiialyq saraptama taǵaiyndaldy», - dedi Ishki ister ministri Erlan Turǵymbaev,
IIM basshysy tergeýshiler áýe apatyna ákep soqtyrǵan barlyq oqiǵalardyń hronologiiasyn qalpyna keltirý kerektigin atap ótti. Osy maqsatta qyzmetkerler ushýdy uiymdastyrý men ótkizýge qatysatyn barlyq jerdegi jáne aviatsiialyq qyzmetterdiń jumysyn tekseredi, jaýapty tulǵalardan jaýap alý jáne osy reistiń jolaýshylarynan saýalnama alý júrgiziledi.
Ushý-qoný jolaǵyna tekserý júrgizildi. Áýe kemesinen ózdiginen jazǵysh quraldary men bort jýrnaly alyndy. Qazirgi ýaqytta ushaqtyń qulaý aýdanyn tekserý jalǵasýda.
Halyqaralyq talaptarǵa jáne osy sanattaǵy qylmystyq isterdi tergeý erekshelikterine sáikes oǵan halyqaralyq aviatsiia komitetiniń (HAK) jáne ushaqty daiyndaýshy zaýyttyń ókilderi qatysady, olarmen birge alynǵan ózdiginen jazý quraldaryndaǵy jazbalardyń mánin anyqtaý, keme qozǵaltqyshy men oqiǵa ornyn tekserý júrgiziledi.
Apatqa ushyraǵan áýe kemesi 1996 jyly Gollandiiada «Fokker» zaýytynda jasalyp, 2020 jyldyń 21 mamyryna deiin ushý jaramdylyǵy sertifikatyna ie bolǵany anyqtaldy.
Jedel-tergeý toby birneshe nusqalardy, sonyń ishinde kemeniń tehnikalyq aqaýyn, aýa raiy jáne meteorologiialyq jaǵdailardy, sondai-aq ushý kezinde jiberilýi múmkin qatelerdi pysyqtaidy.
28 jeltoqsandaǵy jaǵdai boiynsha Almaty qalasynyń meditsinalyq mekemelerinde 47 zardap shekken, onyń ishinde 9 bala statsionarlyq emdelýde. Zardap shekken 4 adamǵa meditsinalyq tekserýden keiin ambýlatorlyq em taǵaiyndalyp, úilerine jiberildi. Qaza bolǵandardyń sany ózgergen joq (12 adam).
