Búgin QR Premer-Ministriniń orynbasary Eraly Toǵjanovtyń tóraǵalyǵymen Qazaqstan Respýblikasynyń aýmaǵynda koronavirýstyq infektsiianyń taralýyna jol bermeý jónindegi vedomstvoaralyq komissiianyń otyrysy ótti, dep habarlaidy "Ult aqparat".
Keńes jumysyna memlekettik organdardyń ókilderi men óńir basshylary qatysty. Kún tártibinde epidemiologiialyq jaǵdaidyń órshýi jáne «omikron» shtamynyń ainalymy máseleleri qozǵaldy.
Densaýlyq saqtaý ministri Ajar Ǵiniiat baiandama jasady. Ol epidemiialyq jaǵdaidyń kúrdelenip jatqanyn atap ótti. Tek sońǵy táýlikte 4 myńnan astam adamda virýs anyqtalǵan. Qazirdiń ózinde 4 aimaq «qyzyl» aimaqqa endi.
Vedomstvoaralyq komissiia infektsiia taralýyn boldyrmaý úshin sanitariialyq-karantindik sharalardy qatańdatý týraly sheshim qabyldady.
Atap aitqanda:
- «jasyl» mártebesi bar tulǵalarǵa ǵana saýda-oiyn-saýyq ortalyqtary, saýda úileri men karaokege kirýge ruqsat berý týraly normany uzartý;
- 13 qańtardan bastap «omikron» shtamyn eskere otyryp, SPA-ǵa, sporttyq-saýyqtyrý jáne fitnes-ortalyqtaryna tek «jasyl» mártebesi bar adamdarǵa ruqsat berý;
- 15 qańtardan bastap vaktsinatsiialaný mártebesine qaramastan shetelden kelgenderdiń barlyǵynda teris PTR testiniń mindetti túrde bolýy;
Sondai-aq, «qyzyl» aimaqqa kirgen Nur-Sultan, Almaty, Shymkent qalalarynda jáne Atyraý oblysynda shekteý sharalaryn kúsheitý usynyldy.
Atap aitqanda:
- 30 adamnyń qatysýymen «Ashyq» nysandarynda ótkiziletin eske alý sharalaryn qospaǵanda, buqaralyq is-sharalardy ótkizýge tyiym salý;
- Oiyn-saýyq, mádeni uiymdardyń qyzmetine, dini sharalardy jáne ártúrli konferentsiialar men seminarlardy ótkizýge tyiym salý;
- Qoǵamdyq tamaqtaný oryndaryndaǵy bir ústeldegi adamdar sanyn 4 adamǵa deiin azaitý;
- Oqýshylardyń onlain nysanyndaǵy oqýlary 2022 jylǵy 31 qańtarǵa deiin, orta jáne joǵary oqý oryndarynyń barlyq kýrstaǵy stýdentteri úshin 2022 jyldyń 6 aqpanyna deiin;
- Bilim ortalyqtarynyń, balalar men eresekterge arnalǵan úiirmelerdiń jumysyn onlain-formatqa kóshirý;
- Memlekettik organdar, ulttyq kompaniialar men kásiporyndar qyzmetkerleriniń keminde 70% qashyqtan jumys isteýge kóshýi tiis;
- Áleýmettik qashyqtyqty saqtaý múmkindigi úshin qoǵamdyq kólik sanyn kóbeitý.
Keńes sońynda Vitse-Premer ákimdikterge azamattardy vaktsinatsiialaý jáne qaita vaktsinatsiialaý qarqynyn kúsheitýdi, Úkimet qabyldaǵan sharalardyń saqtalýyn baqylaýǵa erekshe nazar aýdarýdy tapsyrdy.
