Kóliktegi bas memlekettik sanitarlyq dáriger Sádýaqas Baiǵabylov 6 qazannan beri Qazaqstanǵa halyqaralyq áýe reisteri boiynsha 426 ushaq ushyp kelgenin málim etti, dep habarlaidy "Ult aqparat".
«6 qazannan bastap tiisti qaýly talaptaryna sáikes sheteldik azamattar PTR test anyqtamasyz áýe bortyna kirgizilmeýi tiis. Alaida olardyń keibiriniń anyqtamasynyń ýaqyty ótip ketkendikten nemese keibiri ekspress-testpen kelgendikten 31 sheteldik azamat deportatsiialandy. Deportatsiialanǵan 31 jolaýshy - Resei, Ýkraina, Belarýs, Túrkiia, Germaniia, Ulybritaniianyń elderiniń azamattary», - dedi Sádýaqas Baiǵabylov OKQ-da ótken baspasóz máslihatynda.
Onyń aitýynsha Qazaqstanǵa halyqaralyq áýe reisteri boiynsha 426 ushaq ushyp kelgen. Olardyń ishinde 19 reisten koronavirýs juqtyrǵandar anyqtalǵan.
«Halyqaralyq áýe reisterine júrgizilgen monitoring barysynda koronavirýs juqtyrǵan 39 jolaýshymen bailanysta bolǵan azamattardan jáne bortserikterden virýs anyqtalmady», - dedi ol.
Eske sala ketsek búgin QR Úkimetiniń baspasóz qyzmeti vedomstvoaralyq komissiianyń áýe kompaniialaryna PTR testi nátijesi týraly anyqtamasy joq jolaýshylardy ushaqqa otyrǵyzýǵa tyiym salý týraly sheshimin túsindirgen bolatyn.
Bul talap tek sheteldik azamattarǵa qatysty. Shetelde júrgen QR azamattarynyń áýe reisterimen PTR testileýden ótkeni týraly anyqtamasynsyz otanyna oralýǵa quqyǵy bar. Mundai jaǵdaida Qazaqstanǵa kelgennen keiin qazaqstandyqtar PTR testileý nátijesin alǵanǵa deiin karantinge ornalastyrylatyn bolady.
QR óńirleri arasyndaǵy ishki áýe reisteriniń ushaǵyna otyrǵyzý kezinde PTR test nátijesi týraly anyqtama talap etilmeidi.
