№1 Pavlodar qalalyq aýrýhanasynyń bas dárigeri Nurlan Jumajanov jalpy quny 78 million teńgege úsh jasandy tynys aldyrý apparatyn satyp alý sebebin túsindirdi.
Buǵan deiin atalǵan aýrýhana árbiriniń baǵasy 26 million teńgege baǵalanǵan jasandy tynys aldyrý apparattaryn satyp alýdy josparlap otyrǵany týraly aqparat BAQ-ta jariialanǵan bolatyn.
Sonymen qatar, jaqynda ǵana Semeidegi meditsinalyq jedel járdem stantsiiasy 15,5 million teńgege 25 jasandy tynys aldyrý apparatyn satyp alýǵa tender ótkizgen. Al Qostanai oblystyq densaýlyq saqtaý basqarmasy osyndai 60 meditsinalyq qurylǵy alý úshin 37,2 million teńge bólse, Atyraý oblysy 15 qondyrǵyǵa 9,3 million teńge qarastyrǵan.
Salystyrmaly túrde osyndai derekter jariia bolǵannan keiin pavlodarlyq sybailas jemqorlyqqa qarsy is-qimyl agenttiginiń mamandary qalalyq aýrýhanada arnaiy tekserý júrgizdi.
Aýrýhananyń bas dárigeri Nurlan Jumajanov sybailas jemqorlyqqa qarsy is-qimyl agenttiginiń Facebook paraqshasyndaǵy efirinde máseleniń mán-jaiyn túsindirdi. Onyń aitýynsha, jasandy tynys aldyrý qurylǵylary ártúrli bolyp keledi: naýqastardy jedel járdem kóligimen tasymaldaýda qoldanylatyny – portativti jáne aýrýhanalarda ornatý arnalǵan statsionarlyq qondyrǵylar – statsionarly.
"Biz álemdegi jetekshi óndirýshilerdiń biri bolyp tabylatyn áigili nemis kompaniiasynan anesteziologiialyq jáne reanimatsiialyq úsh statsionarlyq qurylǵyny alǵymyz keledi", – dedi Nurlan Jumajanov.
Bas dárigerdiń aitýy boiynsha portativti tynys aldyrý apparaty shamamen 500 myń teńge tursa, statsionarlyq qondyrǵy – 20 men 40 million teńge aralyǵyn quraidy.
Aita keteiik, qazirgi kezde №1 Pavlodar qalalyq aýrýhanasynda on statsionarlyq tynys aldyrý qurylǵysy bar, olardyń barlyǵy da jumys istep tur.
