Ushaq bortynda «bomba», «jarylys», «terrorist», «qarý» nemese «basyp alý» siiaqty sózderdi ázil retinde aitý reistiń keshigýine jáne jaýapkershilikke ákelýi múmkin, dep habarlaidy ult.kz.
Kólik ministrliginiń málimetinshe, kúndelikti ómirde jai áńgime nemese ázil retinde qabyldanatyn mundai sózder ushaq bortynda aviatsiialyq qaýipsizdikke tóngen qater retinde baǵalanýy múmkin.
Mysaly, Almaty – Aqtaý baǵytyndaǵy reisterdiń birinde jolaýshy «bomba» degen sóz aitqan. Osydan keiin aviatsiialyq qaýipsizdik qyzmeti men kóliktik politsiia qyzmetkerleri shaqyrylyp, er adam reisten túsirilgen.
Oqiǵa saldarynan ushaqtyń ushýy eki saǵatqa jýyq ýaqytqa keshiktirilgen.
Nelikten mundai sózderge birden áreket jasalady?
Ekipaj aitylǵan sózdiń ázil ekenin nemese naqty qaýip týraly aqparat ekenin birden anyqtai almaidy. Sondyqtan kez kelgen yqtimal qater týraly málimdemege belgilengen qaýipsizdik rásimderi boiynsha áreket jasalady.
Mundai jaǵdaida:
- áýe kemesi men bagaj tekserilýi múmkin;
- aviatsiialyq qaýipsizdik qyzmeti men politsiia tartylady;
- qajet bolǵan jaǵdaida jolaýshylar evakýatsiialanady;
- áýejaidyń jekelegen aimaqtaryna kirý shektelýi múmkin;
- reis keiinge qaldyrylyp, áýe kemesi nemese ekipaj aýystyrylýy yqtimal.
Bul áýe kompaniiasy men áýejaiǵa qosymsha shyǵyn keltirip, basqa jolaýshylarǵa da qolaisyzdyq týǵyzady.
Qazaqstanda mundai áreket úshin jaýapkershilik te qarastyrylǵan. QR Qylmystyq kodeksiniń 273-babyna sáikes terrorizm aktisin jasaýǵa daiyndalyp jatqany týraly kórineý jalǵan habarlama jasaǵany úshin aiyppul, túzeý jumystary nemese bas bostandyǵyn shekteý túrindegi jaza kózdelgen.
Kólik ministrligi jolaýshylarǵa ushaqta jáne áýejaida bomba, jarylǵysh zat, qarý, terrorizm, áýe kemesin basyp alý jáne basqa da qaýip-qaterlerge qatysty sózderdi sebepsiz aitpaýǵa, mundai taqyrypta ázildemeýge shaqyrdy.
Óitkeni mundai málimdemeniń ázil retinde nemese shyn nietpen aitylǵany mańyzdy emes. Eger sóz yqtimal qaýiptiń bar ekenin kórsetse, aviatsiialyq qaýipsizdik qyzmetkerleri oǵan tiisti deńgeide áreket etýge mindetti.
