Qazaqstannyń birinshi, álemniń 20-raketkasy Elena Rybakina US Open týrniriniń tórtinshi ainalymyna shyǵa almady, dep habarlaidy "Ult aqparat" QazAqparat agenttigine silteme jasap.
Rybakina úshinshi ainalymda dodanyń ortalyq kortynda álemniń burynǵy birinshi raketkasy, qazirgi kezde reitingte 13-orynda turǵan «Úlken dýlyǵa» dodasynyń eki márte jeńimpazy, rýmyniialyq Simona Haleppen kúsh synasty.
Qarsylastar buǵan deiin eki márte kezdesken edi. Budan eki jyl buryn Ýhanda (Qytaida) ótken jarysta birinshi sette esep 4:5 bolǵan kezde Halep jaraqatyna bailanysty oiyndy jalǵastyra almaǵan bolatyn. Esesine ótken jyly aqpanda Dýbaidaǵy týrnirdiń finalynda S.Halep 3:6, 6:3, 7:6 (7:5) esebimen ese qaiyrǵan-dy.
Bul joly birinshi partiiada qazaqstandyq tennisshi alǵa ketkenimen, Halep kambek jasady. Sosyn asa tartysty tai-breikte sheberlik tanytty – 7:6 (13:11).
Ekinshi sette de Rybakina 3:0 esebimen alǵa shyqqanymen, rýmyniialyq sportshy tarazy basyn taǵy teńestirdi – 3:3. Esep 4:4 bolǵan mezette Elena taǵy bir breik jasap, setti eispen bitirdi – 6:4.
Úshinshi, sheshýshi partiia basynda Rybakina breik jasaǵanymen, tájiribesi mol Halep sol boida qarymta qaiyrdy – 1:1. Qazaqstandyq tennisshiniń sharshaǵanyn ári urymtal sátterdi tiimdi paidalanǵan ol esepti 4:1-ge jetkizdi. Sosyn matchqa dop bergende, qatelesken joq – 6:3.
Eki saǵat jarymǵa jýyq ýaqytqa sozylǵan tartysty básekede Rybakina 14 eis jasap, 11 breik-pointtyń jeteýin óz esebine jazdy. Qarsylasy 1 eis, 7 breikke (10 breik-point) qol jetkizdi.
Halep shirek finalǵa shyǵý úshin álemniń 5-raketkasy, ýkrainalyq Elina Svitolina nemese reitingte 27-satydaǵy reseilik Daria Kasatkinanyń bireýimen talasady.
Osylaisha AQSh ashyq chempionatynda jekelei synda Qazaqstannan eshkim qalmady.
