قازاقستاننىڭ بٸرٸنشٸ, ەلەمنٸڭ 20-راكەتكاسى ەلەنا رىباكينا US Open تۋرنيرٸنٸڭ تٶرتٸنشٸ اينالىمىنا شىعا المادى, دەپ حابارلايدى "ۇلت اقپارات" قازاقپارات اگەنتتٸگٸنە سٸلتەمە جاساپ.
رىباكينا ٷشٸنشٸ اينالىمدا دودانىڭ ورتالىق كورتىندا ەلەمنٸڭ بۇرىنعى بٸرٸنشٸ راكەتكاسى, قازٸرگٸ كەزدە رەيتينگتە 13-ورىندا تۇرعان «ٷلكەن دۋلىعا» دوداسىنىڭ ەكٸ مەرتە جەڭٸمپازى, رۋمىنييالىق سيمونا حالەپپەن كٷش سىناستى.
قارسىلاستار بۇعان دەيٸن ەكٸ مەرتە كەزدەسكەن ەدٸ. بۇدان ەكٸ جىل بۇرىن ۋحاندا (قىتايدا) ٶتكەن جارىستا بٸرٸنشٸ سەتتە ەسەپ 4:5 بولعان كەزدە حالەپ جاراقاتىنا بايلانىستى ويىندى جالعاستىرا الماعان بولاتىن. ەسەسٸنە ٶتكەن جىلى اقپاندا دۋبايداعى تۋرنيردٸڭ فينالىندا س.حالەپ 3:6, 6:3, 7:6 (7:5) ەسەبٸمەن ەسە قايىرعان-دى.
بۇل جولى بٸرٸنشٸ پارتييادا قازاقستاندىق تەننيسشٸ العا كەتكەنٸمەن, حالەپ كامبەك جاسادى. سوسىن اسا تارتىستى تاي-برەيكتە شەبەرلٸك تانىتتى – 7:6 (13:11).
ەكٸنشٸ سەتتە دە رىباكينا 3:0 ەسەبٸمەن العا شىققانىمەن, رۋمىنييالىق سپورتشى تارازى باسىن تاعى تەڭەستٸردٸ – 3:3. ەسەپ 4:4 بولعان مەزەتتە ەلەنا تاعى بٸر برەيك جاساپ, سەتتٸ ەيسپەن بٸتٸردٸ – 6:4.
ٷشٸنشٸ, شەشۋشٸ پارتييا باسىندا رىباكينا برەيك جاساعانىمەن, تەجٸريبەسٸ مول حالەپ سول بويدا قارىمتا قايىردى – 1:1. قازاقستاندىق تەننيسشٸنٸڭ شارشاعانىن ەرٸ ۇرىمتال سەتتەردٸ تيٸمدٸ پايدالانعان ول ەسەپتٸ 4:1-گە جەتكٸزدٸ. سوسىن ماتچقا دوپ بەرگەندە, قاتەلەسكەن جوق – 6:3.
ەكٸ ساعات جارىمعا جۋىق ۋاقىتقا سوزىلعان تارتىستى بەسەكەدە رىباكينا 14 ەيس جاساپ, 11 برەيك-پوينتتىڭ جەتەۋٸن ٶز ەسەبٸنە جازدى. قارسىلاسى 1 ەيس, 7 برەيككە (10 برەيك-پوينت) قول جەتكٸزدٸ.
حالەپ شيرەك فينالعا شىعۋ ٷشٸن ەلەمنٸڭ 5-راكەتكاسى, ۋكراينالىق ەلينا سۆيتولينا نەمەسە رەيتينگتە 27-ساتىداعى رەسەيلٸك داريا كاساتكينانىڭ بٸرەۋٸمەن تالاسادى.
وسىلايشا اقش اشىق چەمپيوناتىندا جەكەلەي سىندا قازاقستاننان ەشكٸم قالمادى.
