30 tamyzda bastalatyn US Open týrnirinde qazaqstandyq tennisshilerdiń qarsylastary anyqtaldy, dep habarlaidy QazAqparat.
Jekelei synda áielder arasyndaǵy jarysqa Qazaqstannan tórt tennisshi qatysady.
Elimizdiń birinshi, álemniń 20-raketkasy Elena Rybakina alǵashqy ainalymda dúniejúzilik reitingide 99-orynda turǵan Belarýs ókili, tájiribeli sportshy Aleksandra Sasnovichpen kezdesedi.
Álemniń 33-raketkasy Iýliia Pýtintseva reitingte 70-oryndaǵy, taǵy bir tisqaqqan oiynshy, 36 jastaǵy estoniialyq Kaiia Kanepimen kúsh synasady.
Reitingte 110-orynda turǵan Zarina Diiasqa álemniń 73-raketkasy, jýyrda 20 jasqa tolatyn amerikalyq Amanda Anisimova qarsylas atandy.
Qazaqstan áielder quramasynyń kapitany, reitingte 449-satydaǵy tájiribeli Iaroslava Shvedova álemniń 98-raketkasy, italiialyq Iasmin Paolinimen kortqa shyǵady.
Eske sala keteiik, budan buryn M.Kýkýshkinniń US Open týrniriniń irikteý saiysynyń finalyna shyqqanyn jazǵan bolatynbyz.
Erler arasynda Qazaqstannyń birinshi, álemniń 37-raketkasy Aleksandr Býblik alǵashqy ainalymda reitingte 134-satydaǵy germaniialyq Iannik Hanfmannyń shamasyn baiqap kóredi. Eger M.Kýkýshkin irikteý saiystarynyń finalynda qarsylasyn utsa, negizgi dodaǵa ol da qosylady.
