Qazaqstannyń birinshi, álemniń 37-raketkasy Aleksandr Býblik US Open týrniriniń úshinshi ainalymyna shyǵa almady, dep habarlaidy "Ult aqparat".
Osy «Úlken dýlyǵa» dodasynyń 31-raketkasy bolyp tirkelgen Býblik ekinshi ainalymda amerikalyq Djek Sokpen kezdesti.
Sok – qazirgi kezde reitingte 184-orynda turǵanymen, budan tórt jyl buryn segizinshi satyǵa deiin kóterilgen tájiribeli oiynshy.
Qarsylastardyń buǵan deiin joldary toqailaspaǵan.
Birinshi sette tai-breikte amerikalyq sportshy ábjildik tanytty – 7:6 (7:3). Ekinshisinde Býblik sondai tartysty geimde ese qaiyrdy – 7:6 (7:2).
Úshinshisinde Sok 6:4 esebimen qaita alǵa shyqsa, tórtinshisinde qazaqstandyq tennisshi tarazy basyn teńestirdi – 6:4.
Sheshýshi, besinshi partiiada kort iesi jeńiske jetti – 6:3.
Býblik 3 saǵat 32 minýtqa sozylǵan match barysynda 40 eis jasap, 14 breik-pointtyń altaýyn paidalandy. D.Soktyń enshisinde – 6 eis, 7 breik (17 breik-point).
Osylaisha AQSh ashyq chempionatynda jekelei synda Qazaqstannan Elena Rybakina ǵana qaldy. Ol úshinshi ainalymda álemniń burynǵy birinshi raketkasy, rýmyniialyq Simona Haleppen oinaidy.
