Qazaqstannyń birinshi, álemniń 37-raketkasy Aleksandr Býblik US Open týrniriniń ekinshi ainalymyna shyqty, dep habarlaidy QazAqparat.
Osy «Úlken dýlyǵa» jarysynyń 31-raketkasy bolyp tirkelgen qazaqstandyq tennisshi bastapqy kezdesýin dúniejúzilik reitingte 134-orynda turǵan germaniialyq Iannik Hanfmanmen ótkizdi.
Birinshi partiiada Býblik qarsylasyna birde-bir geim bergen joq – 6:0.
Ekinshi settiń jetinshi geiminde Býbliktiń dop berýdegi qatelikterinen keiin germaniialyq sportshy breikpen alǵa shyqty – 4:3. Bul sette sol basymdylyǵyn saqtap qaldy – 6:4.
Hanfmann úshinshi partiiany breikpen bastady – 2:0. Budan keiin óz geimin asa bir qiyndyqpen alǵan Býblik qaiyra breik jasap, tarazy basyn teńestirdi – 2:2. Osy qarqynnan taimai, qatarynan alty geimge qol jetkizdi – 6:2.
Tórtinshi sette qazaqstandyq tennisshi breik jasap, alǵa ketti – 4:1. Taǵy bir breik – 5:1. Aqyry matchty eispen bitirdi – 6:1.
Qazaqstandyq sportshy 1 saǵat 51 minýtqa sozylǵan matchta 18 eis jasap, 13 breik-pointtyń segizin múlt jibergen joq. Hanfmann 6 eis, 2 breikpen (13 breik-point) ǵana shekteldi.
Býblik úshinshi ainalymǵa shyǵý úshin álemniń 69-raketkasy, japoniialyq Esihito Nisioka nemese reitingte 184-satydaǵy amerikalyq Djek Soktyń bireýimen talasady.
Ótken jyly AQSh-tyń ashyq chempionatynda Býblik alǵashqy ainalymnan asa almaǵan edi.
Taǵy bir qazaqstandyq, reitingte 110-oryndaǵy Zarina Diias birinshi matchynda álemniń 75-raketkasy, jazdyń sońǵy kúni 20 jasqa tolǵan amerikalyq Amanda Anisimovaǵa 5:7, 2:6 esebimen ese jiberdi. Bir saǵattan astam ýaqytqa sozylǵan oiynda Zarina birde-bir eis jasai alǵan joq. 2 breik-pointtyń ekeýin de paidalandy. Anisimova 3 eis, 5 breikke (12 breik-point) qol jetkizdi.
Osylaisha US Open dodasynda jekelei synda Qazaqstannan Aleksandr Býblik pen Elena Rybakina ǵana qaldy. Elena ekinshi ainalymda frantsiialyq Karolin Garsiiamen kortqa shyǵady.
Eske sala keteiik, budan buryn Iýliia Pýtintsevanyń US Open týrnirinde jeńilip qalǵanyn, Elena Rybakinanyń jeńispen bastaǵanyn, Mihail Kýkýshkinniń ekinshi ainalymǵa shyǵa almaǵanyn jazǵan bolatynbyz.
Sondai-aq Iaroslava Shvedova qarsylasyna ese jiberdi.
