قازاقستاننىڭ بٸرٸنشٸ, ەلەمنٸڭ 37-راكەتكاسى الەكساندر بۋبليك US Open تۋرنيرٸنٸڭ ەكٸنشٸ اينالىمىنا شىقتى, دەپ حابارلايدى قازاقپارات.
وسى «ٷلكەن دۋلىعا» جارىسىنىڭ 31-راكەتكاسى بولىپ تٸركەلگەن قازاقستاندىق تەننيسشٸ باستاپقى كەزدەسۋٸن دٷنيەجٷزٸلٸك رەيتينگتە 134-ورىندا تۇرعان گەرمانييالىق ياننيك حانفمانمەن ٶتكٸزدٸ.
بٸرٸنشٸ پارتييادا بۋبليك قارسىلاسىنا بٸردە-بٸر گەيم بەرگەن جوق – 6:0.
ەكٸنشٸ سەتتٸڭ جەتٸنشٸ گەيمٸندە بۋبليكتٸڭ دوپ بەرۋدەگٸ قاتەلٸكتەرٸنەن كەيٸن گەرمانييالىق سپورتشى برەيكپەن العا شىقتى – 4:3. بۇل سەتتە سول باسىمدىلىعىن ساقتاپ قالدى – 6:4.
حانفمانن ٷشٸنشٸ پارتييانى برەيكپەن باستادى – 2:0. بۇدان كەيٸن ٶز گەيمٸن اسا بٸر قيىندىقپەن العان بۋبليك قايىرا برەيك جاساپ, تارازى باسىن تەڭەستٸردٸ – 2:2. وسى قارقىننان تايماي, قاتارىنان التى گەيمگە قول جەتكٸزدٸ – 6:2.
تٶرتٸنشٸ سەتتە قازاقستاندىق تەننيسشٸ برەيك جاساپ, العا كەتتٸ – 4:1. تاعى بٸر برەيك – 5:1. اقىرى ماتچتى ەيسپەن بٸتٸردٸ – 6:1.
قازاقستاندىق سپورتشى 1 ساعات 51 مينۋتقا سوزىلعان ماتچتا 18 ەيس جاساپ, 13 برەيك-پوينتتىڭ سەگٸزٸن مٷلت جٸبەرگەن جوق. حانفمانن 6 ەيس, 2 برەيكپەن (13 برەيك-پوينت) عانا شەكتەلدٸ.
بۋبليك ٷشٸنشٸ اينالىمعا شىعۋ ٷشٸن ەلەمنٸڭ 69-راكەتكاسى, جاپونييالىق ەسيحيتو نيسيوكا نەمەسە رەيتينگتە 184-ساتىداعى امەريكالىق دجەك سوكتىڭ بٸرەۋٸمەن تالاسادى.
ٶتكەن جىلى اقش-تىڭ اشىق چەمپيوناتىندا بۋبليك العاشقى اينالىمنان اسا الماعان ەدٸ.
تاعى بٸر قازاقستاندىق, رەيتينگتە 110-ورىنداعى زارينا ديياس بٸرٸنشٸ ماتچىندا ەلەمنٸڭ 75-راكەتكاسى, جازدىڭ سوڭعى كٷنٸ 20 جاسقا تولعان امەريكالىق اماندا انيسيموۆاعا 5:7, 2:6 ەسەبٸمەن ەسە جٸبەردٸ. بٸر ساعاتتان استام ۋاقىتقا سوزىلعان ويىندا زارينا بٸردە-بٸر ەيس جاساي العان جوق. 2 برەيك-پوينتتىڭ ەكەۋٸن دە پايدالاندى. انيسيموۆا 3 ەيس, 5 برەيككە (12 برەيك-پوينت) قول جەتكٸزدٸ.
وسىلايشا US Open دوداسىندا جەكەلەي سىندا قازاقستاننان الەكساندر بۋبليك پەن ەلەنا رىباكينا عانا قالدى. ەلەنا ەكٸنشٸ اينالىمدا فرانتسييالىق كارولين گارسييامەن كورتقا شىعادى.
ەسكە سالا كەتەيٸك, بۇدان بۇرىن يۋلييا پۋتينتسەۆانىڭ US Open تۋرنيرٸندە جەڭٸلٸپ قالعانىن, ەلەنا رىباكينانىڭ جەڭٸسپەن باستاعانىن, ميحايل كۋكۋشكيننٸڭ ەكٸنشٸ اينالىمعا شىعا الماعانىن جازعان بولاتىنبىز.
سونداي-اق ياروسلاۆا شۆەدوۆا قارسىلاسىنا ەسە جٸبەردٸ.
