Almatyda avtobýstardyń soqtyǵysýynan qaza tapqan Muhit Isahanovty týystary búgin jer qoinyna tapsyrdy. Marqumnyń jaqyndary 37 jastaǵy jigit apat bolǵan sátte 98-shi baǵyttaǵy avtobýstyń ishinde bolǵanyn aitady, - dep habarlaidy Massaget.kz portaly KTK telearnasyna silteme jasap.
Týystarynyń aitýynsha, City bus tasymaldaýshy kompaniiasynda taǵylymdamadan ótip júrgen Muhit qoǵamdyq kóliktiń baǵytymen tanysý maqsatynda júrgizýshiniń janynda turǵan. Qos avtobýs soqtyǵysqanda marqum avtobýstyń salonynan syrtqa qarai qulap, ony qoǵamdyq kólik janshyp ótken.
"Balamnyń ólgenine sengen joqpyn. Tergeýshi habarlap aitty. Qaita-qaita suradym. Mamandyǵy júrgizýshi ǵoi. Artynda eki balasy, kelinim qaldy. Ońai emes", - deidi Isahanovtyń anasy Qarlyǵash Isahanova.
Marqumnyń jaqyndary da Muhit qaiǵyly oqiǵa bolǵan kúni 98-shi avtobýstyń baǵytymen tanysý maqsatynda "júrgizýshiniń janynda turǵan" deidi. Qos qoǵamdyq kólik soqtyǵysqan sátte 98-shi avtobýstyń esik-terezesinen úsh adamnyń syrtqa qarai birneshe metrge ushyp túskenin beinebaqylaý kamerasynan baiqaýǵa bolady. Sol kezde jerge ońbai qulaǵan Muhitty salmaǵy ondaǵan tonna 201-shi avtobýs basyp ótken.
"Abylaihan kóshesimen kóterilgen 98-shi avtobýstyń ishinde boldy. Aldyńǵy jaǵynda júrgizýshiniń qasynda turǵan. Avtobýstar soǵylǵanda esikten ushyp ketken. Nesie tóleimin, tirshilik jasaimyn dep bardy ǵoi", - deidi Isahanovtyń apasy Móldir Isahanova.
Al tasymaldaýshy kompaniia Muhittyń óndiristik tájiribeden ótkenin rastady. Alaida apat bolǵan kúni ol avtobýs parkine kelmegen.
"Sol kúni taǵylymdamadan ótýshi retinde tirkelgen Muhit avtobýs parkine kelmedi. 8 qarashada ol № 98 avtobýs baǵyty boiynsha joldama qujattaryn alý úshin Almaty ONAY kólik holdingine ketken", - deidi "City Bus" JShS.
Jol apatyn jan jaqty zerttep jatqan politsiia naqty kimniń kúdikke ilingenin áli aitqan joq. Tergeý áli jalǵasyp jatyr.
Eske salaiyq, Almatyda eki jolaýshylar avtobýsy soqtyǵysyp, bir adam qaza bolyp, 15 adam jaraqat alǵan bolatyn.
