Dúniejúzilik toǵyzqumalaq federatsiiasy men QR Ardagerler Keńesi qazaqtyń ulttyq ziiatkerlik oiyny – toǵyzqumalaqty damytý boiynsha ortaq kelisimge keldi. Federatsiia prezidenti Alihan Baimenov pen Keńes tóraǵasy Ábilǵazy Qusaiynov eki uiymnyń arasyndaǵy yntymaqtastyq týraly memorandýmǵa qol qoidy, dep habarlaidy ult.kz.
Jiynda toǵyzqumalaq jastar tárbiesinde ǵana emes, ardagerlerdiń intellektýaldyq, fizikalyq, mentaldy qalpyn saqtap, damytýda paidaly qural ekendigi aityldy. Alihan Baimenovtiń aitýynsha, keibir oblystardaǵy belsendi qariialyq ortalyqtar tájiribesi toǵyzqumalaqtyń egde adamdardyń da densaýlyǵyna oń áserin kórsetken.
“Óitkeni, munda mimen qatar qumalaq úlestirgendegi motorika – qol, saýsaqtar qimyly qatar jumys jasaidy. Bul adamdardyń babynda saqtalýyna, ómir súrýin uzartýǵa qosymsha faktor bola alatyndyǵyn zertteýshiler pikirleri men ortalyqtar tájiribesi baiqatady”.
Sondyqtan Alihan Baimenov ardagerlik uiymdarmen jumys isteýge múddeli ekendikterin atap ótti. Memorandým toǵyzqumalaqty dáriptep, nasihattaý úshin jarystar, seminarlar, túrli oqý-jattyǵý sharalaryn birlese ótkizýge baǵyttalǵan.
Ábilǵazy Qusaiynov ta óz tarapynan ardagerler ulttyq-mádeni muramyz – toǵyzqumalyqty nasihattaýǵa óz úlesterin qosýǵa yntaly ekendikterin bildirdi. Ulttyq mádeni muranyń jarqyn úlgisi - toǵyzqumalaqtyń ardagerler arasynda keńinen taralýy úlgimen tárbieleý turǵysynan da, jasampazdyqty saqtaý turǵysynan da mańyzdy ekendigi aityldy.
Kezdesý sońynda Alihan Baimenov Ábilǵazy Qusaiynovqa toǵyzqumalaq taqtasyn tartý etip, eki uiym basshylary jáne Ardagerler keńesi tóraǵasy birinshi orynbasary Abai Tasbýlatov alǵashqy partiiany oinady.
Qazaqstanda shamamen 80 myńnan astam ardager bar dep sanalady. Toǵyzqumalaqpen ainalysatyn qazaqstandyqtar jalpy sany 200 myńnan asqan. Álemniń 50-den astam elinde qazaqtyń ulttyq oiyny – toǵyzqumalaqty kásibi deńgeide oinaityn sportshylar tirkelgen.
