Búgin Parlament Májilisiniń jalpy otyrysynda palata depýtattary jer qoinaýyn paidalaný máseleleri boiynsha qujatqa Senat engizgen tolyqtyrýmen kelisti, dep habarlaidy "Ult aqparat".
Atap aitqanda, 2020 jyldyń 23 jeltoqsanynda Parlament Májilisi «Jer qoinaýy jáne jer qoinaýyn paidalaný týraly» Qazaqstan Respýblikasynyń Kodeksine ýran óndirý máseleleri boiynsha ózgerister men tolyqtyrýlar engizý týraly» zań jobasyn ekinshi oqylymda maquldaǵan bolatyn.
Biylǵy 17 aqpanda Senattyń jalpy otyrysynda «atalǵan zań jobasy eki oqylymda qaraldy. Qujatqa tolyqtyrý engizilgendikten, zań jobasy Májiliske qaitaryldy.
Zań jobasy Senat komitettiń keńeitilgen otyrysynda ekinshi oqylymda qaraldy. Qujat elimizdegi ýran óndirý salasyn quqyqtyq retteýdi jetildirýge baǵyttalǵan. Memleket basshysynyń biylǵy 26 qańtarda Úkimettiń keńeitilgen otyrysynda memlekettik jáne jeke operatorlardy qurýǵa tyiym salý jónindegi bergen tapsyrmasyn oryndaý maqsatynda Senat depýtattary zań jobasynyń birinshi babynyń besinshi tarmaqshasynyń 14,15,16,17,18-shi jáne 19-shy abzatsty alyp tastaýdy usyndy. Úkimettiń biylǵy 17 aqpanda kelgen qorytyndysyna sáikes, bul usynys qoldaý tapty. Zań jobasyndaǵy barlyq túzetýler ýran salasyndaǵy qarym-qatynastardy ári qarai jetildirýge baǵyttalǵan.
Qujatty búgin Májilistiń jalpy otyrysynda depýtat, Ekologiia máseleleri jáne tabiǵat paidalaný komitetiniń tóraǵasy Aleksandr Miliýtin QR Parlamenti Senaty engizgen ózgertýmen kelisýdi usyndy. Zań jobasyn qaraý kezinde palata depýtattary bul usynysqa qoldaý bildirdi.
