Qyrǵyzstan Ministrler kabineti janyndaǵy azamattyq aviatsiia agenttigi men Reseidiń "Ýralskie avialinii" áýe kompaniiasy "Júk 200-di" tegin tasymaldaýǵa kelisti.
Qyrǵyzstannyń Reseidegi elshiligi kelisimge 17 mamyrda qol qoiylǵanyn habarlady. Elshilik málimetine qaraǵanda, "Júk 200" Reseidiń Cheliabinsk, Ýfa, Mineralnye Vody, Nijnevartovsk, Qazan, Samara, Sochi qalalarynan Qyrǵyzstannyń Osh qalasyna jáne Samara men Sochiden Bishkek qalasyna tegin tasymaldanady. "Júk 200-di" jiberýshi áýekompaniiasyna perron jáne áýejai alymy úshin tóleýge tiis.
Sáýir aiynda Qyrǵyzstannyń Reseidegi elshiligi Qyrǵyzstannyń Reseide ólgen 15 azamatyn ("Júk 200") jiberýge atsalysqan. Alaida Qyrǵyzstan zańy boiynsha, qaitys bolǵandardyń týystary men jaqyndary deneni áketýge jumsalǵan shyǵyndy jabýǵa tiis.
Buǵan deiin Reseide jyl saiyn Qyrǵyzstannyń 300-den astam azamaty qaitys bolatyny, olardyń denesin Qyrǵyzstanǵa jetkizý týystaryna úlken problemaǵa ainalǵany habarlanǵan. Ólgen adamdy tasymaldaý qymbat protsedýra qataryna jatady.
Resmi málimet boiynsha, Qyrǵyzstannyń bir million 118 myń azamaty shetelde, onyń milliony Reseide jumys isteidi.
