2026 jylǵy sáýir-mamyr ailarynda Ulttyq qaýipsizdik komiteti (UQK) tergegen qylmystyq ister aiasynda terrorizm jáne ekstremizmge qatysty qylmystar jasaǵany úshin 13 adam ártúrli merzimge bas bostandyǵynan aiyryldy, dep habarlaidy ult.kz.
UQK málimetinshe, sottalǵandardyń biri – Astana qalasynyń turǵyny áleýmettik jelilerde terroristik ideologiiany nasihattap, azamattardy terroristik belsendilik aimaqtaryna barýǵa úgittegen. Sot ony 8 jylǵa bas bostandyǵynan aiyrý týraly úkim shyǵardy.
Sondai-aq Shymkent qalasynyń týmasy Qazaqstan aýmaǵynda teokratiialyq memleket qurýǵa shaqyryp, terrorizm ideialaryn taratqany úshin kináli dep tanyldy. Sot sheshimimen oǵan 7 jyl bas bostandyǵynan aiyrý jazasy taǵaiyndaldy.
Budan bólek, atalǵan kezeńde Astana, Almaty jáne Shymkent qalalarynda, sondai-aq Atyraý, Aqtóbe, Jambyl, Qaraǵandy, Túrkistan jáne Abai oblystarynda ekstremistik jáne terroristik sipattaǵy qylmystar jasady degen kúdikpen 11 adam ustaldy. Olardyń qatarynda eki shetel azamaty jáne shetelden ekstraditsiialanǵan úsh Qazaqstan azamaty bar.
Tergeý derekterine sáikes, kúdiktiler internet jelisinde jáne óz ortasynda ekstremistik materialdardy taratqan. Sonymen qatar olar adamdardy terroristik belsendilik aimaqtaryna barýǵa jáne óz kózqarastarymen kelispeitin azamattarǵa qarsy zorlyq-zombylyq jasaýǵa úndedi degen kúdikke ilingen.
Qazirgi ýaqytta atalǵan faktiler boiynsha Qazaqstan Respýblikasy Qylmystyq kodeksiniń tiisti baptary negizinde sotqa deiingi tergep-tekserý amaldary júrgizilýde.
UQK Qazaqstan Respýblikasy Qylmystyq-protsestik kodeksiniń 201-babynyń 1-bóligine sáikes tergeý múddesine bailanysty ózge aqparattyń jariia etilmeitinin habarlady.
