Taldyqorǵan qalasynda I. Jansúgirov atyndaǵy Jetisý memlekettik ýniversitetiniń 45 jyldyǵy atalyp ótildi. Oqý ornynyń aitýly datasy sheńberinde biotehnologiia máselesiniń ǵylymi-zertteý institýtynyń saltanatty ashylýy ótti.
JOO ujymy men stýdentterin mereitoiymen oblys ákimi Amandyq Batalov quttyqtap, ýniversitet janynan qurylǵan ǵylymi-zertteý institýtynyń ashylýyna qatysty.
Institýttyń quramynda eki - biogeotehnologiia jáne agrobiotehnologiia zerthanalary bar. Olardyń jumysy taý-ken jáne agrarlyq ónerkásip salalaryna innovatsiialyq biotehnologiialyq tásilderdi engizýge negizdeledi. Qazirgi kezde institýtta doktorlar men ǵylym kandidattaryn qosqanda 9 qyzmetker bar. Zertteý jumystaryna «Biologiia» eáne «Ekologiia» fakýltetterinde oqityn stýdentter de tartylady.
Institýt jumysymen keńinen tanysyp, laboratoriiany aralaǵan oblys basshysy zerthana qyzmetkerleriniń jumysyna tabys tilep, tilektestigin bildirdi. Sonymen qatar olardyń agrobiotehnologiia salasyndaǵy eńbekteri búgingi kún úshin, ásirese bizdiń agro-indýstrialdy oblysymyz úshin jáne aýyl sharýashylyǵyna innovatsiialardy engizý jumysy atqarylyp jatqan osy shaqta asa mańyzdy sanalatynyn atap ótti.
Munan soń Amandyq Batalov JOO-nyń 45 jyldyǵyna arnalǵan saltanatty sharaǵa qatysyp, quttyqtaý tilegin jetkizdi.
- Qazaq poeziiasynyń Qulageri Iliias Jansúgirovtiń atymen atalǵan ýniversitet jarty ǵasyrǵa jaqyn ýaqyt ishinde otandyq bilim júiesinde óz orny men dástúri bar bilim ordasyna ainaldy. Ýniversitet túlekteri óńirimizdiń ekonomikasynyń ár salasynda eńbek etip júr. Ásirese, pedagog mamandardyń 90 paiyzǵa jýyǵy - Jetisý memlekettik ýniversiteti daiarlaǵan kadrlar.
Táýelsizdiktiń alǵashqy jyldarynda Prezidentimiz Nursultan Ábishuly Nazarbaevtyń ýniversitetke arnaiy kelip, damýdyń basty baǵyttaryn aiqyndap berýi oqý ornynyń órkendeýine tikelei áser etti. Elbasymyzdyń joǵary bilim berý júiesin damytý jónindegi tapsyrmalaryna orai, búgingi tańda ýniversitette zaman talabyna sai jas býyndy oqytyp, tárbieleý jaqsy jolǵa qoiylǵan. Jetisýdyń basty bilim ordasynda oqyǵan jastarymyz oblystyń, elimizdiń abyroiyn asyra bersin! Ýniversitet ujymyna mol tabys tileimin! – dedi A. Batalov. Bilim ordasynda oblys ákiminiń grantymen bilim alyp jatqan stýdentter oqýyn oqý jylynyń sońyna deiin aiaqtaýy úshin 35 mln. teńgeniń sertifikatyn tabystady. Sonymen qatar oblys ákimi ýniversitet rektory Kýat Baimyrzaevqa oblys ákiminiń alǵys hatyn jáne bilim ordasynyń birqatar qyzmetkerlerine qurmet gramotalaryn tapsyrdy. Shara barysynda Amandyq Batalovqa «Qurmetti professor» ataǵy berildi.
Saltanatqa qulager aqyn Iliias Jansúgirovtiń uly Saiat Jansúgirov arnaiy qatysty. Jiyn ýniversitet túlekteriniń, oqytýshylarynyń, stýdentter men qonaqtardyń izgi tilekterimen jalǵasty.
Jalpy, I. Jansúgirov atyndaǵy Jetisý memlekettik ýniversitetin qurylǵannan beri 49000 túlek bitirgen. Olardyń 35 myńy – pedagogikalyq mamandyqtar boiynsha támamdaǵan. Bitirýshiler arasynda ǵaryshker-synaqshy, aviatsiia general-maiory, «Halyq qaharmany» Aidyn Aiymbetov, Atlantadaǵy Olimpiada oiyndarynyń júldegeri, qola medal iegeri Máýlen Mamyrov ta bar. Búgingi kúni ýniversitette 6 myń stýdent oqidy. Olardyń ishinde 40-y mamandyq boiynsha – bakalavr, 21-i – magistr, 6-ýy – doktoranttar. Biylǵy jyly ýniversitet tuńǵysh ret Eýropa men Orta Aziianyń damýshy úzdik joǵarǵy oqý oryndarynyń arnaiy reitingisinde aldyńǵy qatardaǵy 300-diktiń ishine kirdi. Al ulttyq reiting boiynsha kópsalaly JOO 12-shi orynda.
