Almatyda ótken 28-shi Búkilálemdik qysqy Ýniversiada-2017 qorytyndylary týraly Premer-Ministr Baqytjan Saǵyntaevtyń tóraǵalyǵymen ótken Úkimettiń kezekti otyrysynda mádeniet jáne sport ministri Arystanbek Muhamediuly baiandady.
A. Muhamediuly atap ótkendei, Ýniversiada-2017-ge barlyǵy 57 elden 1 632 sportshy qatysty, 3 000-nan astam erikti úles qosty. Ýniversiadanyń barlyq is-sharalaryna qatynasýǵa 230 myńnan astam bilet satyldy.
Ýniversiada-2017 kórsetilimi EUROSPORT 1 jáne 2, CBS (AQSh), CCTV (Qytai), KBS (Ońtústik Koreia), Match-TV (Resei), Eurosport Asia-Pacific (Avstraliia jáne Okeaniia) arnalarynan 80 elde 1 mlrd. telekórermendik aýditoriiaǵa kórsetildi.
2017 jylǵy Búkilálemdik qysqy Ýniversiada saiystary 8 sporttyq nysanda sporttyń on eki túri boiynsha ótti, olardyń úsheýi - «Almaty arena», «Halyq arena» jáne «Atletikalyq aýyl» Ýniversiadaǵa arnap salyndy.
Qazaqstandyq stýdentter quramasynan 12 sport túrine 171 sportshy qatysty. Medaldardyń rekordtyq sanyna – 36 (11 altyn, 8 kúmis jáne 17 qola) ie boldy jáne jalpy komandalyq eseptiń qorytyndysy boiynsha Qazaqstan 2-shi oryn aldy.
Mádeniet jáne sport ministrliginiń basshysy 5 medal ielengen shańǵyshy Anna Shevchenkony, biatlonshy Galina Vishnevskaiany – 4 medal, jáne elimizdiń qorjynyna altyn medal salǵan basqa da sportshylardy erekshe atap ótti.
«Bizdiń sportshylarymyzdyń jeńisi barlyq sport jurtshylyǵyn dúr silkindirdi jáne búkil álemdegi sportsúier qaýymdy beijai qaldyrǵan joq. Sonymen birge, Ýniversiadadaǵy sporttyq jeńister elimizdiń joǵary ekonomikalyq, áleýmettik jáne mádeni damýynyń dáleli bolyp tabylady», - dep túiindedi A. Muhamediuly.
.jpeg)