Bir apta boiy Úndistan táýlik ishinde koronavirýs juqtyrǵandar sany boiynsha álemdik rekord ornatýda, dep habarlaidy BBC.
Birinshi tolqynda táýligine ortasha alǵanda 93 myń turǵyn koronavirýs juqtyrǵan. 17 sáýirden bastap kúndelikti statistika 200 myń adamǵa deiin kóterilip, sońǵy aptada kúnine 350 myń adamǵa jetip otyr.
Ólim sany da birinshi tolqynmen salystyrǵanda eki esege artty. Sońǵy aptada Úndistanda koronavirýstan táýligine ortasha 2 336 adam qaitys bolýda.
Eldegi eń aýyr jaǵdai Delide, munda aýrýhanalarda ÓJJA ornatylǵan oryndar qalmaǵan.
Basqa iri qalalarda da jaǵdai osyndai. Resmi statistika boiynsha, pandemiianyń basynan beri Úndistanda 17 mln adam koronavirýs juqtyryp, 192 myń adam qaitys bolǵan.
Halyq sanynyń kóptigi jáne olardyń udaiy jyljyp otyrýy Covid-19-ǵa testileý ótkizýge jáne naqty ólim sany boiynsha esep júrgizýge kedergi keltiredi. Sol sebepti Úndistandaǵy daǵdarystyń shynaiy masshtabyn baǵalaý qiynǵa soǵyp otyr.
BBC tilshisiniń aitýynsha, eldegi masshtabty vaktsinalaý baǵdarlamasy úlken qiyndyqtarǵa tap bolýda. Bul baǵdarlama 16 qańtar kúni bastalǵan, shildege deiin 250 mln adamdy vaktsinalaýdy kózdegen. Qazirgi kezde vaktsinanyń birinshi dozasyn 118 mln adam ǵana alǵan, bul – halyqtyń 9%-y.
«Pandemiia bizge barlyq el problemalarynyń ortaq ekendigin túsindirdi. Bir Qytai qalasynda paida bolǵan koronavirýs endi búkil álemde», - deidi BBC tilshisi Djeims Gallaher.
Juqtyrý rekordy Úndistan shekarasyn asýy múmkin, sol sebepti kóp elder bul elmen áýe qatynasyn toqtatty.
Britaniia, Braziliia jáne Ońtústik Afrikada paida bolǵan koronavirýstyń jańa túri ózge elderde úlken problemalar týdyrdy. Fizika jáne biologiia professory, juqpaly aýrýlardy modeldeý salasyndaǵy sarapshy Menon Úndistanda virýstyń jańa túri paida bolýy múmkin ekendigin eskertti.
Dúniejúzilik qaýymdastyq Úndistanǵa daǵdarysty jeńýge kómek kórsetýde. Ulybritaniia elge ÓJJA jáne koiýlanǵan ottek qorlaryn jiberdi, AQSh Úndistanǵa AstraZeneca vaktsinasyn kóp mólsherde óndirýge múmkindik berý úshin bastapqy materialdar eksportyna tyiymdy ýaqytsha alyp tastady. Kóptegen elder bilikti qyzmetkerler men jeke qaýipsizdik quraldaryn usynýda.
