Jeksenbi kúni Úndistan astanasy Delidiń soltústigindegi Anadj Mandi aýdanynda fabrika órtenip, 43 adam mert boldy, dep habarlaidy "Ult aqparat".
Politsiianyń málimetinshe, jaraqat alǵan jáne kúiik shalǵandardyń sany 50-den asady.
Oqiǵa ornyna órt sóndirý jáne qutqarý qyzmetteriniń 30-dan astam mashinasy jumyldyryldy.
India Today TV habarlaýynsha, órt sóndirýshilerge operatsiia bastalar aldynda tilsiz jaýdyń tuzaǵynda qalyp qoiǵan adamdar týraly aitylmaǵan. Bul, adamdardy qutqarý jumysynyń keshýildeýine sebep bolyp, qurbandar sany artqan.
Politsiia órt shyqqan kezde fabrikada 59 adamnyń bolǵanyn málimdedi. Jalyn turǵyn aimaqta ornalasqan tórt qabatty ǵimarattyń ekinshi qabatynda tutanǵan.
Apat ornyna jinalǵan adamdar kóp boldy, olardyń basym bóligi qaza tapqandar men jaraqat alǵandardyń týystary.
Úndistan premer-ministri Narendra Modi fabrikadaǵy oqiǵany «jan túrshigerlik órt» dep atady.
«Jaqyndaryn joǵaltqandardyń qaiǵysyna ortaqpyn. Zardap shekkenderdiń tezirek saýyǵyp ketýin tileimin. Bilik oqiǵa ornynda múmkin bolǵan barlyq kómekti kórsetip jatyr», - dep habarlady ol.
Politsiia kásiporynnyń iesine izdeý saldy.
Jergilikti organdar atalǵan fakti boiynsha tekserýdi bastady. Aita keteiik, bul apat - Úndistan astanasynda bolǵan eń úlken jáne jantúrshigerlik órtterdiń biri.
