Úndistanda 9 mamyrda 366 myńnan asa adamnan koronavirýs tabylyp, 3754 adam Covid dertinen qaza tapty. Sarapshylar bul elde virýs juqtyrǵandar men kóz jumǵandar resmi statistikadan áldeqaida kóp dep sanaidy.
Úndistan premer-ministri Narendra Modi saiasatkerler men dárigerlerdiń elde tolyq lokdaýn engizý talabyna qulaq aspai otyr. Biraq jergilikti bilikter óz aimaǵynda lokdaýn engizip jatyr.
Deli qalasynyń biligi 20 sáýirde bastalǵan lokdaýn 17 mamyrǵa deiin sozylatynyn habarlady. Búgin, 10 mamyrdan bastap Delide metropoliten jumysy toqtaidy.
Dúniejúzilik densaýlyq saqtaý uiymynyń bas ǵylymi qyzmetkeri Sýmiia Svaminatan AFP agenttigine bergen suhbatynda "Úndistandaǵy virýstyń órshýine B.1.617 úndi shtamymen jurttyń dini jáne saiasi sharalarǵa jappai qatysýy sebep boldy" degen.
Úndistan shtamy bul elde byltyr qazanda tabylǵan. AQSh pen Ulybritaniia sarapshylary úndi shtamy koronavirýstyń alǵashqy shtamynan áldeqaida jyldam taraidy ári qaýipti deidi.
AQSh-taǵy Djon Hopkins ýniversitetiniń dereginshe, álemde 157,7 mln adamnan virýs tabylyp, 3,3 mln adam kóz jumdy, al Úndistanda 22 mln adamǵa virýs juqqanyn, 242 myń adam qaitys bolǵan.
Úndistan qazir álemde virýs juqtyrǵandar sany boiynsha AQSh-tan (32,6 mln adam virýs juqtyryp, 581 myń adam kóz jumdy) keiingi ekinshi orynda tur.
