Úkimet basshysy Baqytjan Saǵyntaev Úndistan azamattary úshin 72 saǵattyq vizasyz rejimdi engizý máselesin pysyqtaýdy tapsyrdy, dep xabarlaidy QazAqparat tilshisi.
«Negizi, sońǵy jyldary áýejailardyń infraqurylymy xalyqaralyq talaptarǵa sai jasaqtaldy. Birneshe qala qaldy. 2020 jylǵa deiin osy jumysty aiaqtaý qajet. Aqsha bar. Endi, júktelgen mindetterdi der kezinde oryndaý qajet», - dep atap kórsetti B.Saǵyntaev.
Osy oraida Úkimet basshysy jolaýshylary tasymalynyń artyp jatqanyn erekshe atap ótti.
«Tórt jyl buryn bizde jolaýshylar tranziti nóldik deńgeide bolǵan. Qazirgi kezde biz 800 myń adamnyń mejesine shyǵyp otyrmyz. Osy oraida Úndistan azamattary úshin 72 saǵattyq vizasyz rejimdi engizý máselesin pysyqtaýymyz qajet. Osy eldiń xalqy milliardtan asatynyn eskersek, óz jerimiz arqyly ótetin jolaýshylardyń kólemin aitarlyqtai ulǵaitýǵa bolady dep oilaimyn. Osy máseleni sheshsek, 800 myń jolaýshylar tranzitin 1 millionnan asyra alamyz», - dep atap kórsetti B.Saǵyntaev.
