© Photo: pixabay/rebcenter-moscow
Úndistannyń Kalkýtta qalasynda turatyn úndige kúieýge shyqqan qazaq áiel qazaqstandyqtardan kómek suraidy, dep habarlaidy Sputnik Qazaqstan.
Qaraǵandylyq áiel jaǵdaiynyń aýyr ekenin aityp, "Nemolchi" qoǵamdyq qorynan kómek suraǵan. Áieldiń aitýynsha, kámeletke tolmaǵan 10, 3 jáne 1 jastaǵy úsh balasymen turmystyq zorlyq-zombylyqqa ushyraǵan.
"Eger meniń azǵantai múmkindigim bar bolsa, Úndistannan ketýime kómektesińizdershi. Meniń bul jerde ólgim kelmeidi. Balalaryma baqytta bolashaq syilaǵym keledi. Kúieýim meni soqqyǵa jyǵyp, úidiń astań-kesteńin shyǵarady. Eger elime barsam, jumys istep balalarymdy aiaqqa turǵyzar edim", - deidi áiel.
Aitýynsha, kúieýi maskúnem, balalary azyq-túlikten tarshylyq kórgen. Eshqaida attap shyǵarmaidy. Úlken qyzyna bilim alýǵa ruqsat bermeidi. Úlken balasynyń vizalyq rejimi joiylǵan, al eki kishi balasynyń vizasy joq.
"Ol meniń barlyq jiǵan qarajatymdy tartyp aldy. Kúieýge shyqqanǵa deiin eshbir oǵash qylyǵy bolmaǵan", - dep jazǵan áiel.
Sputnik Qazaqstan máseleniń mán-jaiyn syrtqy ister ministrliginen surady.
"28 tamyzda Qazaqstannyń Úndistandaǵy elshiligine Qazaqstan azamatshasy habarlasyp, oǵan jáne onyń 3 balasyna elimizge oralýǵa kómek kórsetý týraly ótinish bildirdi. Ol Úndistan azamaty bolyp tabylatyn kúieýimen birge Kalkýtta qalasynda turady. Azamatshamyzdyń aitýynsha, onyń kúieýi oǵan moraldyq qysym jasaidy, qarjylai shekteidi jáne kúsh qoldaný áreketimen qorqytady. Jeke otbasylyq janjaldar aiasynda atalǵan áiel Qazaqstanǵa oralýǵa niet bildirdi", - dedi Cyrtqy ister ministrliginiń baspasóz jetekshisi Aibek Smadiiarov.
Ministrliktiń aitýynsha, otandasymyzdyń úlken qyzy QR azamaty, al qalǵan ekeýi – Úndistan azamattary.
"Úlken qyzynyn Úndistan vizasynyń merzimi ótip ketken, bul kóshi-qon zańnamasyn buzý bolyp sanalady. Al kishi eki balany áketý úshin ekinshi ata-ananyń zańdy ruqsaty qajet. Qalyptasqan kúrdeli jaǵdaidy eskere otyryp, qazaqstandyq diplomattar otandasymyzǵa qajetti konsýldyq-quqyqtyq kómek kórsetip jatyr. Sonymen qatar Qazaqstannyń Kalkýttadaǵy konsýly qujattar máselesin sheshý úshin kómek kórsetýde", - deidi Aibek Smadiiarov.
Ministrlik ókiliniń aitýynsha, másele Qazaqstannyń Úndistandaǵy elshiliginiń erekshe baqylaýynda.
