Foto: Depositphotos.com
10 mamyr kúni «Otbasy bank» «Umai» baǵdarlamasy boiynsha ótinishter qabyldai bastaidy, dep habarlaidy QazAqparat banktiń baspasóz qyzmetine silteme jasap.
Biyl genderlik baǵdarlamany nesielendirýge 15,6 mlrd teńge jumsalady. Bul qarajatty «Aziia damý banki» úshinshi transh aiasynda bólip otyr.
«Umai» baǵdarlamasy ekinshi nemese úshinshi turǵyn úi satyp alýdy kózdep otyrǵan, kirisi joǵary áielderge arnalǵan. Biyl biz «ADB»-men birlesip, «Umai» baǵdarlamasyna tabysy 200 000 teńgeden aspaityn áielder de qatysa alady dep sheshtik. Eger olar tólem qabilettiligin rastasa, eń tómengi 15% bastapqy jarnamen nesie alady. Biz olarǵa bólingen qarajat aiasynda jalpy nesielendirýdiń 20%-ǵa jýyǵyn bólýdi josparlap otyrmyz», - dep túsindirdi «Otbasy bank» AQ Basqarma tóraǵasy Lázzat Ibragimova.
«ADB» sharttaryna sáikes Astana, Almaty, Aqtaý jáne Atyraý qalalaryna zaemnyń jalpy kóleminiń 40% aspaityn bóligin nemese 200-ge jýyq nesie bólý josparlanyp otyr. Nesieniń 60%-y oblystar men shaǵyn qalalardyń turǵyndaryna berilmek. Maqsat – óńirlerdegi áielderdi qoldaý jáne nesieleýde disproportsiiany boldyrmaý.
Baǵdarlama boiynsha beriletin zaemnyń eń joǵarǵy quny 30 mln teńgege deiin. Paiyzdyq mólsherleme biyl – 14,4% (JTSM – 15,4% bastap), keiin ol 3,5%-5%-ǵa deiin (JTSM – 3,6% bastap) tómendetiledi.
Qaryz alý merzimi – 6 aidan 25 jylǵa deiin. Bul rette turǵyn úi tańdaýda shekteýler joq, ony alǵashqy jáne ekinshi naryqtan, sonyń ishinde úlestik qatysý sharttary boiynsha satyp alýǵa bolady. Sondai-aq, «Umai» boiynsha baspanany jóndeý jumystaryna da 3,7 mln teńgege deiingi mólsherde qaryz alýǵa bolady.
Áleýetti qaryz alýshynyń ai saiynǵy otbasylyq tabysy 550 000 teńgeden aspasa, ol 15%-dyq bastapqy jarnamen nesie ala alady. Al, otbasynyń ortaq kirisi aiyna 550 001 teńgeden 640 000 teńgege deiingi aralyqta bolsa, onda turǵyn úidi 20%-dyq alǵashqy jarnamen alýǵa bolady.
Genderlik teńdikti jetildirýge negizdelgen baǵdarlamany iske asyrýǵa «ADB» bas-aiaǵy 38 mlrd teńge kóleminde qarajat bólip otyr. 2021 jyly «Umai» baǵdarlamasy bastalǵan kezde, birinshi transh aiasynda, jalpy kólemi 8,4 mlrd teńgege 954 qazaqstandyq qyz-kelinshek qaryz alǵan bolatyn. 2022 jyly 14 mlrd teńge bólindi. Bul qarajatqa 1 119 qyz-kelinshek baspanaly boldy.
