Foto: QR MAM
QR Mádeniet jáne aqparat ministrliginiń qoldaýymen «Uly dala eliniń rýhani temirqazyǵy – Ulytaý» atty jas aqyn-jazýshylardyń respýblikalyq seminar-keńesi ótti, dep habarlaidy Ult.kz.
Seminar-keńeske elimizdiń túkpir-túkpirinen kelgen jas qalamgerler, ministrlik janynan qurylǵan «Alqa» ádebi klýbynyń músheleri jáne jergilikti ziialy qaýym ókilderi qatysty.
Alqaly jiynda qalamgerler qazirgi qazaq ádebietiniń damý úrdisi, shyǵarmashylyq izdenister, kitap shyǵarý isi men ádebi jobalar jaily pikir almasyp, tájiribe bólisti. Sondai-aq is-shara barysynda ulttyq ádebiettiń altyn qoryna engen 100 kórnekti týyndyny anyqtaýǵa baǵyttalǵan jalpyulttyq saýalnama keńinen talqylandy.
Eki kúnge sozylǵan baǵdarlama aiasynda qatysýshylar Joshy han, Alasha han jáne Dombaýyl keseneleri men Han Oordasy siiaqty tarihi-mádeni nysandardy aralap, ult shejiresine qatysty mańyzdy derektermen tanysty.
Is-shara sheńberinde oblystyq «Ular» ádebi klýbynyń keńsesi ashylyp, S.Qojamqulov atyndaǵy Ulytaý oblystyq qazaq mýzykalyq-drama teatrynyń qoiylymy kórermenge usynyldy.
Aita keteiik, QR Mádeniet jáne aqparat ministrliginiń janynan qurylǵan «Alqa» jastar ádebi klýby jas qalamgerlerdi qoldaý, tarihi-rýhani murany nasihattaý baǵytynda buǵan deiin Astana, Almaty, Jetisý, Abai jáne Qaraǵandy oblystarynda ádebi týrlar men kóshpeli otyrystar ótkizgen bolatyn.
Seminar-keńestiń negizgi maqsaty – Ulytaýdyń tarihi, rýhani jáne mádeni mańyzyn nasihattaý arqyly ulttyq biregeilikti nyǵaitý, otandyq aqyn-jazýshylardyń shyǵarmashylyǵy arqyly el rýhyn kóterý jáne Ulytaý óńiriniń ult tarihyndaǵy airyqsha ornyn keńinen tanytý.
