Altyn Ordanyń 750 jyldyǵy qarsańynda «Ulytaý. Ulyq ulys» atty derekti filmi kórermenge jol tartty, dep habarlaidy "Ult aqparat" E-history.kz portalyna silteme jasap.
Tarihi-tanymdyq baǵyttaǵy filmdi «Qazaqstan tarihy» internet-jobasy túsirgen.
Derekti filmniń basty maqsaty - Ulytaý óńirindegi ultymyzǵa mura bolyp qalǵan kieli jerlerdi dáriptep, týristerdiń kóptep kelýine qoldaý kórsetý. Derekti film 2 bólimnen turady.
Atalǵan filmde Qaraǵandy oblysy Ulytaý aýdanynyń kieli jerleri men Edige esimin alǵan taýdyń tóbesinde jerlengen Edige, Toqtamys, odan bólek, Joshy han, Alasha han jáne ózge de tarihi tulǵalardyń keseneleri, Han ordasy, Áýlietaý (aqmeshit) syndy qasietti oryndar kórinis tapqan. Sondai-aq Ulytaý aýdanynyń ortalyǵy Ulytaý aýyly da beinelengen.
Aita keter bolsaq, ótken jyly QR Prezidenti Qasym-Jomart Toqaev ult uiasy Ulytaýǵa barǵan saparynda Joshy han esimin joǵary deńgeide ulyqtaý sharasyn jedeldetý kerektigin aita kele, Altyn Orda (Ulyq ulys) imperiiasynyń 750 jyldyq mereitoiyn merekeleý týraly bastama kótergen. Sondai-aq Memleket basshysy Ulytaýdy halyqaralyq deńgeidegi etnografiialyq týrizm ortalyǵy retinde nasihattaýdy basa aitqan edi.
Sonyń arqasynda Ulytaý aýdanyndaǵy Joshy han kenesesiniń irgesinde tarihi-mádeni keshen qurylysyn bastady. Joshy jáne Alasha han kesenesinde ǵylymi-restavratsiialaý jumystary júrgizildi. «Ulytaý» vizit ortalyǵy salynyp, paidalanýǵa jaqyn qaldy.
