Foto: polisia.kz
Ishki ister ministrligi qala quraýshy kásiporyndardaǵy jedel jaǵdaidy turaqty túrde baqylaýda ustaidy jáne olardyń qyzmetine kedergi keltiretin adamdardyń zańsyz áreketiniń jolyn kesý boiynsha sharalar qabyldaidy, – dep habarlaidy Polisia.kz.
Keiingi aida Ulytaý oblysynda osyndai birneshe top ustalǵan.
"Uiymdasqan qylmysqa qarsy kúres bólinisiniń qyzmetkerleri "Qazaqmys korporatsiiasy" JShS qaýipsizdik qyzmetimen birlesip, qymbat metall qorytpalaryn urlaýdy jolǵa qoiǵan qylmystyq top áreketiniń jolyn kesti. Topqa atalǵan kásiporynnyń qyzmetkerleri de kirgen. Kúdiktiler kásiporynnan 6,5 mln teńge ónimin urlaý kezinde ustaldy", - deidi IIM uiymdasqan qylmysqa qarsy kúres departamentiniń basqarma bastyǵy Qýandyq Alpys.
Qazirgi ýaqytta olardyń basqa qylmystarǵa qatysy bar-joǵy tekserilip jatyr.
Sondai-aq politsiia 2022 jyldyń naýryz aiynda jergilikti kásipkerden 20 mln teńge bopsalaǵan taǵy bir top múshelerin quryqtaǵan. Jábirlenýshini jaldamaly páterge aldap alyp kelip, fizikalyq kúsh qoldanyp, qarý-jaraqpen qorqytý arqyly aqsha talap etken. Sonymen qatar 2018 jyly oryn alǵan jergilikti turǵyndy óltirýge oqtalý áreketi áshkerelendi.
"Jergilikti kriminalitetten quralǵan qylmystyq top anyqtaldy. Oǵan qatysýshylar qazirgi ýaqytta basqa qylmystar jasaǵany úshin jazasyn ótep jatyr. Kisi óltirýge oqtalý áreketi jasalǵan tapansha tárkilendi. Kórsetilgen faktiler boiynsha barlyǵy 17 adam ustalyp, ishki ister organdaryna jetkizildi. 20-dan astam tintý sharalary ótkizildi, nátijesinde 5 atys qarýy, oq-dáriler, pyshaqtar jáne ekstremistik sipattaǵy dini ádebietter tárkilendi. Barlyq fakt boiynsha sotqa deiingi tergeý júrgizilýde. Óńirlerde qylmystyq toptardyń qyzmetine jol bermeý jumystary jalǵasýda", - dedi ol.
