Óńir turǵyndarynyń orta eseppen jan basyna shaqqandaǵy tabysy aiyna 353 myń teńgege jetti. Bul – eldegi ortasha kórsetkishten shamamen 40%-ǵa joǵary. Osy kórsetkish boiynsha Ulytaý oblysy Qazaqstannyń barlyq óńirleri arasynda ekinshi, al oblystar arasynda birinshi orynda tur, dep habarlaidy Ult.kz.
Ulttyq statistika biýrosy 2026 jyldyń I toqsanyndaǵy halyqtyń orta eseppen jan basyna shaqqandaǵy ataýly aqshalai tabysy boiynsha derekterdi jariialady. Málimetke sáikes, Ulytaý oblysy jan basyna shaqqandaǵy tabys deńgeii boiynsha elimizdegi kóshbasshy óńirlerdiń qataryna endi.
Qańtar–naýryz ailarynda óńir turǵyndarynyń orta eseppen jan basyna shaqqandaǵy ataýly aqshalai tabysy aiyna 353 myń teńgeni qurady. Bul kórsetkish boiynsha Ulytaý oblysy Qazaqstannyń barlyq óńirleri arasynda ekinshi orynǵa ie boldy. Birinshi orynda Almaty qalasy, munda jan basyna shaqqandaǵy tabys 408,2 myń teńgege jetti. Sondai-aq óńir kórsetkishi 352,8 myń teńgeni quraǵan Astana qalasynan sál joǵary nátije kórsetti.
Al elimizdiń oblystary arasynda Ulytaý birinshi orynda tur. Odan keiingi oryndarda Atyraý oblysy — 323,7 myń teńge, Mańǵystaý oblysy — 288,9 myń teńge jáne Pavlodar oblysy — 284 myń teńge ornalasqan.
Jalpy Qazaqstan boiynsha halyqtyń jan basyna shaqqandaǵy ortasha aqshalai tabysy 252,6 myń teńgeni qurady. Osylaisha Ulytaý oblysynyń kórsetkishi respýblikalyq ortasha deńgeiden 100 myń teńgeden astamǵa nemese shamamen 40%-ǵa joǵary.
Aita ketý kerek, jan basyna shaqqandaǵy aqshalai tabys ortasha jalaqy deńgeiine qaraǵanda áldeqaida aýqymdy uǵym bolyp tabylady. Bul kórsetkishke tek eńbek aqysy ǵana emes, sonymen qatar zeinetaqy, járdemaqy, kásipkerlik qyzmetten, múlikten túsetin kiris jáne ózge de aqshalai túsimder kiredi. Jalpy tabys somasy óńirdegi barlyq turǵyndar sanyna, onyń ishinde balalar, zeinetkerler jáne jumys istemeitin azamattardy qosa eseptep bólinedi.
Ulytaý oblysynyń joǵary kórsetkishi óńir ekonomikasynyń qurylymymen tyǵyz bailanysty. Atap aitqanda, aimaqtaǵy eń iri jumys berýshilerdiń biri «Qazaqmys» kompaniialar Toby bolyp tabylady. Kásiporyndardyń turaqty jumysy, óndiristik jáne investitsiialyq jobalardyń iske asyrylýy, sondai-aq bilikti mamandarǵa suranystyń joǵary bolýy halyq tabysynyń ósýine jáne Jezqazǵan, Sátbaev qalalary men oblystyń ózge de eldi mekenderindegi iskerlik belsendiliktiń artýyna yqpal etýde.
