«Ulymyzdy óltirgen kúdikti 6 aidan beri bostandyqta júr». Almaty oblysyna qarasty Uzynaǵash aýylynyń turǵyny Muhat Madiiarov balasynyń ólimine sebepshi bolǵan adam jazadan qutylyp ketedi dep alańdaidy. Bul týraly Almaty.tv telearnasy habarlady.
Onyń aitýynsha, osyǵan deiin de birneshe márte qylmystyq jaýapkershilikke tartylǵan azamat esh negizsiz amnistiiaǵa ilikken.
Muhat Madiiarov 6 aidan beri ulynyń qazasy úshin ádildik izdep, shyryldap júr. Qarasai aýdandyq politsiia bóliminiń tabaldyryǵyn tozdyryp, kináli azamatty jaýapqa tartý kerektigin aityp sharshadym deidi. Zeinetkerge tipti tergeýshiler de dórekilik tanytqan kórinedi.
«Tergeýshi Isa maǵan telefonmen habarlasyp,kelip qol qoiyńyz, qaida shaǵymdansańyz da men sheshemin dedi. 15 isti tergep jatyr eken. Sondyqtan ýaqyty joq dep dórekilik tanytty», – dedi marqumnyń ákesi Muhat Madiiarov.
Qaiǵyly oqiǵaǵa sebep bolǵan janjal ótken jyldyń 26 qarashasynda bolǵan. Videoda kórsetilgendei kúdikti marqumnyń keýde tusynan 2 márte uryp, keiin iterip jibergen. Barlyq kórinis beinebaqylaý kamerasyna jazylyp qalypty. Jerge qulaǵan marqum sol jerde 40 minýttai es-tússiz jatqan deidi ákesi. Qasyndaǵylar ony aýrýhanaǵa da aparmaǵan. Tipti, sol jerde bolǵan kýáger ulyn kólikke salyp, úiiniń mańyna tastap ketken. Balasy artynsha komaǵa túsip, qaitys bolypty. Artynda oń-solyn tanyp úlgermegen qos búldirshini qaldy dep zar jylap otyr. Ol kúdiktige qatysty aiǵaq tabylsa da birde-bir ret sot otyrysy bolmaǵanyna qapaly.
«Meniń áli de is-qujatty qaita qarap, teksertip, oqiǵa ornyndaǵy kýágerlerdi jaýap alyp, ádil sheshim shyǵady dep senemin», – dedi marqumnyń ákesi Muhat Madiiarov.
Al kúdikti raqymshylyqqa ilikti degen ákesiniń sózin Qarasai aýdandyq prokýratýrasy da rastap otyr.
«Kúdiktiniń isi QK-tiń 106-babynyń 3-bólimimen jáne 104-baptyń 1-bóligine sai abaisyzda bolǵan qylmystyq oqiǵa bolyp tirkeldi. Bul is aýyr qylmys sanatyna jatpaidy. Soǵan bailanysty táýelsizdiktiń 30 jyldyǵy aiasynda raqymshylyq jasaý týraly sheshim shyqty», – dedi Qarasai aýdany prokýrorynyń orynbasary Erjan Ombaev.
Marqumnyń ata-anasy bul sheshimmen kelispeidi. Olar is aiaqsyz qalatyn bolsa, Bas prokýratýraǵa júginip, ári qarai Prezidentke hat jazbaq niette.
