Foto: ashyq derekkóz
Qazaqstannyń eńbek sińirgen qairatkeri, marqum kompozitor Arman Dúisenovtyń jubaiy Aisulý Aidanqyzy Prezident Qasym-Jomart Toqaevtan kómek surady. Ol bul týraly «TalkLike» baǵdarlamasynda málimdedi, dep habarlaidy Ult.kz.
Aisulý Aidanqyzynyń aitýynsha, 2024 jyldyń 7 qazanynda 21 jastaǵy uly Abylai Dúisen óz páterinde qol-aiaǵy bailanǵan kúiinde óli kúiinde tabylǵan. Qaiǵyly oqiǵaǵa qatysty tergeý áli kúnge deiin naqty sheshimge kelmegen.
Sonymen qatar ol Almaty qalasy sottary shyǵarǵan sheshimder ádiletsiz ekenin aityp, 2025 jyldyń 24 qazanynda Bostandyq aýdandyq soty Aisulý Aidanqyzy, onyń 13 jastaǵy balasy jáne 83 jastaǵy ákesin turyp jatqan páterden shyǵarý týraly sheshim shyǵarǵanyn alǵa tartty.
Aitýynsha, sot páterge qatysty daýdy Abylaidyń ólimi boiynsha tergeý aiaqtalmai turyp qaraǵan. Al máseleni kótergen Muqash Sanjar tergeý barysynda marqum Abylaidan tek qaryzǵa aqsha bergenin, páterdi kepilge ǵana alǵanyn kórsetken. Tergeý sotynyń 2024 jylǵy 15 qazan jáne 2025 jylǵy 30 shildedegi qaýlylarynda bul málimet rastalǵan.
Marqum men Muqash arasyndaǵy hat almasýlarda 65 mln teńgeniń óte joǵary paiyzben qaryzǵa berilgeni aiqyndalǵan. Al daýlasýshy tulǵanyń naryqtyq quny 140 mln teńge bolatyn páterdi iemdenýge umtylǵany kórinip turǵanyna qaramastan, sot qylmystyq istiń materialdaryn suratpaǵan kúii birjaqty sheshim shyǵarǵan.
Aisulý Aidanqyzy bul jaǵdai ádiletsizdik dep sanap, Prezidentten jeke baqylaýǵa alýdy jáne ádildik ornatýǵa kómektesýdi surap otyr.
