Bishkekte jańa «Bishkek Arena» stadionynyń ashylýyna arnalǵan kontsertke 60 myńǵa jýyq kórermen jinaldy. Sharaǵa Qazaqstan, Qyrǵyzstan jáne basqa elderden tanymal ónerpazdar qatysqan. Qyrǵyzstandyq BAQ-tar kontserttiń aýqymyna joǵary baǵa bergenimen, uiymdastyrýǵa qatysty birqatar syn da aitylǵanyn jazdy, dep habarlaidy ult.kz.
Qyrǵyzstannyń Kaktus.media basylymy ashylý keshinde Ninety One, «Irina Kairatovna», Qairat Nurtas, Sadraddin, Yenlik, «Dos-Muqasan» jáne basqa da qazaqstandyq ónerpazdar óner kórsetkenin jazdy. Sonymen qatar qyrǵyzstandyq Mirbek Atabekov, Bek Borbiev, Ulukmanapo jáne ózge oryndaýshylar da sahnaǵa shyqqan.
Al «Vechernii Bishkek» kontsertine barǵan kórermenderdiń pikirin jariialap, jańa arenanyń aýqymyn erekshe atap ótti. Basylymǵa suhbat bergen kórermender stadionnyń kólemine jáne kontserttiń atmosferasyna joǵary baǵa bergen.
Qazaqstandyq ánshilerdiń ónerine qatysty da áleýmettik jelide pikirler aitylǵan.
Máselen, Sadraddin óner kórsetip jatqan kezde sahna shetine jaqyndaǵan operator tepe-teńdigin joǵaltyp, qulai jazdaǵan. Ánshi ony ustap qalýǵa tyrysqanymen, operatordy ustai almaǵan, biraq onyń kamerasyn qaǵyp úlgergen. Bul video áleýmettik jelilerde tarap, qyrǵyzstandyq kórermender Sadraddinniń áreketin talqylaǵan.
Qairat Nurtas pen Mirbek Atabekovtiń birge oryndaǵan «Suranamyn» áni de keshtiń este qalǵan sátteriniń biri boldy. Qyrǵyzstandyq kórermender bul dýetti eki eldiń ónerpazdarynyń birlesken áserli qoiylymdarynyń biri retinde atap ótken.
Alaida kontserttiń uiymdastyrylýyna qatysty syn da az bolmaǵan.
Kaktus.media kontserttiń sońǵy hedlainerleri – amerikalyq Redfoo men Party Rock Crew sahnaǵa shyqqan kezde tribýnalardyń bir bóligi bos qalǵanyn jazdy. Kórermenderdiń keibiri kesh ýaqytqa, sýyq aýa raiyna bailanysty kontsert aiaqtalmai jatyp úilerine qaitqan. Shoý túngi saǵat birge deiin sozylǵan.
Áleýmettik jeli qoldanýshylary kontserttiń tym uzaqqa sozylǵanyn, kórermenderdiń tońǵanyn jáne kólik máselesi bolǵanyn jazǵan. Keibir pikirlerde qazaqstandyq ánshilerdiń kóp bolǵany jáne negizgi hedlainerlerdiń tym kesh shyqqany synalǵan.
Sonymen birge «Vechernii Bishkek» kólik aialdamalarynyń arenadan qashyq ornalasqanyn jáne kórermenderdiń stadion ishinde óz oryndaryn tabýda qiyndyqtarǵa tap bolǵanyn atap ótti. Úlken adam aǵyny kezinde eki balanyń ata-anasynan adasyp qalǵany da jazylǵan.
Osylaisha, qyrǵyzstandyq BAQ-tardyń materialdaryna qaraǵanda, «Bishkek Arena» ashylýy eldegi eń aýqymdy mýzykalyq sharalardyń birine ainalǵan. Alaida kontserttiń uzaqtyǵy, kólik, navigatsiia jáne kórermenderdi uiymdastyrý máseleleri synǵa túsken.
