بٸشكەكتە جاڭا «بٸشكەك ارەنا» ستاديونىنىڭ اشىلۋىنا ارنالعان كونتسەرتكە 60 مىڭعا جۋىق كٶرەرمەن جينالدى. شاراعا قازاقستان, قىرعىزستان جەنە باسقا ەلدەردەن تانىمال ٶنەرپازدار قاتىسقان. قىرعىزستاندىق باق-تار كونتسەرتتٸڭ اۋقىمىنا جوعارى باعا بەرگەنٸمەن, ۇيىمداستىرۋعا قاتىستى بٸرقاتار سىن دا ايتىلعانىن جازدى, دەپ حابارلايدى ult.kz.
قىرعىزستاننىڭ Kaktus.media باسىلىمى اشىلۋ كەشٸندە Ninety One, «يرينا كايراتوۆنا», قايرات نۇرتاس, Sadraddin, Yenlik, «دوس-مۇقاسان» جەنە باسقا دا قازاقستاندىق ٶنەرپازدار ٶنەر كٶرسەتكەنٸن جازدى. سونىمەن قاتار قىرعىزستاندىق ميربەك اتابەكوۆ, بەك بوربيەۆ, Ulukmanapo جەنە ٶزگە ورىنداۋشىلار دا ساحناعا شىققان.
ال «ۆەچەرنيي بيشكەك» كونتسەرتٸنە بارعان كٶرەرمەندەردٸڭ پٸكٸرٸن جارييالاپ, جاڭا ارەنانىڭ اۋقىمىن ەرەكشە اتاپ ٶتتٸ. باسىلىمعا سۇحبات بەرگەن كٶرەرمەندەر ستاديوننىڭ كٶلەمٸنە جەنە كونتسەرتتٸڭ اتموسفەراسىنا جوعارى باعا بەرگەن.
قازاقستاندىق ەنشٸلەردٸڭ ٶنەرٸنە قاتىستى دا ەلەۋمەتتٸك جەلٸدە پٸكٸرلەر ايتىلعان.
مەسەلەن, Sadraddin ٶنەر كٶرسەتٸپ جاتقان كەزدە ساحنا شەتٸنە جاقىنداعان وپەراتور تەپە-تەڭدٸگٸن جوعالتىپ, قۇلاي جازداعان. ەنشٸ ونى ۇستاپ قالۋعا تىرىسقانىمەن, وپەراتوردى ۇستاي الماعان, بٸراق ونىڭ كامەراسىن قاعىپ ٷلگەرگەن. بۇل ۆيدەو ەلەۋمەتتٸك جەلٸلەردە تاراپ, قىرعىزستاندىق كٶرەرمەندەر Sadraddinنٸڭ ەرەكەتٸن تالقىلاعان.
قايرات نۇرتاس پەن ميربەك اتابەكوۆتٸڭ بٸرگە ورىنداعان «سۇرانامىن» ەنٸ دە كەشتٸڭ ەستە قالعان سەتتەرٸنٸڭ بٸرٸ بولدى. قىرعىزستاندىق كٶرەرمەندەر بۇل دۋەتتٸ ەكٸ ەلدٸڭ ٶنەرپازدارىنىڭ بٸرلەسكەن ەسەرلٸ قويىلىمدارىنىڭ بٸرٸ رەتٸندە اتاپ ٶتكەن.
الايدا كونتسەرتتٸڭ ۇيىمداستىرىلۋىنا قاتىستى سىن دا از بولماعان.
Kaktus.media كونتسەرتتٸڭ سوڭعى حەدلاينەرلەرٸ – امەريكالىق Redfoo مەن Party Rock Crew ساحناعا شىققان كەزدە تريبۋنالاردىڭ بٸر بٶلٸگٸ بوس قالعانىن جازدى. كٶرەرمەندەردٸڭ كەيبٸرٸ كەش ۋاقىتقا, سۋىق اۋا رايىنا بايلانىستى كونتسەرت اياقتالماي جاتىپ ٷيلەرٸنە قايتقان. شوۋ تٷنگٸ ساعات بٸرگە دەيٸن سوزىلعان.
ەلەۋمەتتٸك جەلٸ قولدانۋشىلارى كونتسەرتتٸڭ تىم ۇزاققا سوزىلعانىن, كٶرەرمەندەردٸڭ توڭعانىن جەنە كٶلٸك مەسەلەسٸ بولعانىن جازعان. كەيبٸر پٸكٸرلەردە قازاقستاندىق ەنشٸلەردٸڭ كٶپ بولعانى جەنە نەگٸزگٸ حەدلاينەرلەردٸڭ تىم كەش شىققانى سىنالعان.
سونىمەن بٸرگە «ۆەچەرنيي بيشكەك» كٶلٸك ايالدامالارىنىڭ ارەنادان قاشىق ورنالاسقانىن جەنە كٶرەرمەندەردٸڭ ستاديون ٸشٸندە ٶز ورىندارىن تابۋدا قيىندىقتارعا تاپ بولعانىن اتاپ ٶتتٸ. ٷلكەن ادام اعىنى كەزٸندە ەكٸ بالانىڭ اتا-اناسىنان اداسىپ قالعانى دا جازىلعان.
وسىلايشا, قىرعىزستاندىق باق-تاردىڭ ماتەريالدارىنا قاراعاندا, «بٸشكەك ارەنا» اشىلۋى ەلدەگٸ ەڭ اۋقىمدى مۋزىكالىق شارالاردىڭ بٸرٸنە اينالعان. الايدا كونتسەرتتٸڭ ۇزاقتىعى, كٶلٸك, ناۆيگاتسييا جەنە كٶرەرمەندەردٸ ۇيىمداستىرۋ مەسەلەلەرٸ سىنعا تٷسكەن.
