Rýh joqshylary men ulttyq bolmysty izdegen seriler búgin tektilerdiń mekeni – Jaiaý Musa aýylyna – Jańatilek aýylyna kelip tústi. Olardy Jańatilek aýyldyq okrýginiń ákimi Jabai Musabaev pen aýyl aqsaqaldary aldan shyǵyp kútip aldy.
«Aq sisa» poemasynda Ǵalym Jailybai:
...Kókiregi jyr-kórik,
Qushaq jaiǵan baýyr kóp.
Jaiaý Musa jyr bolyp,
Jaiaý Musa aýyl bop...
... Óter-ótpes beker kún,
Japyraǵymdy jaiam da.
Men kelermin, ketermin –
Baian izdep Baianǵa» - dep jyrlaǵandai, babalar dástúrin dáriptep, baiansyz tirshiliktegi baýyrlastyqty baqyt dep biletin búginginiń serilerin aqyn aýyly aqynnyń ózindei bolyp, sózindei bolyp qarsy aldy.
Meimandar aldynda sóz alǵan Jabai Janábiluly: «Jańatilek aýylynyń aýmaǵynda áigili ánshi, kompozitor, aqyn Jabai Toǵandyqov pen Jaiaý Musa Baijanuly, qusbegi, ańshylar Sholaq Omaruly, Ysqaq Úpánuly, Uly Otan soǵysynyń batyry Baqyt Haidarov, jazýshy Zeitin Aqyshev syndy qazaqtyń marqasqalary dúniege kelgen. Sol babalarymyzdyń atyna kir keltirmeýge tyrysyp, keiingi urpaq ósip-jetilip keledi» - dep Jańatilek aýylynan shyqqan tanymal tulǵalarmen tanystyryp ótti. Aýyl kórkemónerpazdary uiymdastyrǵan keshtiń mártebeli meimandary bolǵan atty sapar músheleri de óz ónerlerin kórsetti.
Qonaqtar qurmetine qissashy, 80 jasqa taiaǵan aýyl aqsaqaly Imash Qojamberdin «Eńlik – Kebek» jyryn jatqa aitty.
Merekelik án-jyr keshinen keiin, at sportyna degen alabóten yqylastaryn tanytqan aýyl azamattary arasynda aýdaryspaq týrniri ótti. At ústindegi beldesýde qarsylas shydatpaǵan ekspeditsiia múshesi oblysqa tanymal atbegi, palýan Baqytjan Júnisov birinshi oryndy jeńip aldy.
Tarihi tulǵalarǵa taǵzym etken top erteń attydan jaiaý júrip kek alǵan aqynnyń beiitine jol tartpaq.
Arnaiy Ult portaly úshin Jańatilek aýylynan Elaman QABDILÁShIM
