Mamyrda Ulybritaniia Ýkraina men NATO-daǵy odaqtastaryn qoldaý úshin Qara teńizge eki áskeri kemesin jibermek. Bul týraly úkimettegi derekkózine siltei otyryp Sunday Times habarlady, dep jazady Azattyq.
Josparǵa qaraǵanda, Bosfor buǵazy arqyly Qara teńizge qarýlanǵan esminets ("Dering" seriiasynan) pen fregat ("Diýk" seriiasynan) joldanbaq. Olarǵa Jerorta teńizinen "Kvin Elizabet" aviatasymaldaǵyshy demeý kórsetpek.
Ulybritaniia qorǵanys ministrliginiń ókili bul aqpar týraly pikir bildirýden bas tartty, biraq London men onyń odaqtastary "Ýkrainanyń egemendigi men aýmaqtyq tutastyǵyn" qoldaidy dedi.
Osyǵan deiin Qara teńizge AQSh-tyń eki esmintsi jiberiledi degen habar taraǵan. Biraq Sunday Times basylymynyń jazýynsha, AQSh prezidenti Djo Baiden Reseimen qarym-qatynasty ýshyqtyrmaý úshin bul jospardan bas tartqan. Túrik basylymdarynyń habarlaýynsha, AQSh Bosfor buǵazy arqyly keme ótkizýge degen ótinishin qaitaryp alǵan. Vashington Qara teńizge keme jiberý jospary týraly pikir bildirmedi.
Resei Ýkrainamen qarym-qatynasy ýshyqqan tusta Qara teńizde áskeri-teńiz flotynyń bir bóligin ustap otyr. Máskeýdiń aitýynsha, onda qazir áskeri jattyǵýlar ótip jatyr. Resei áskeri jattyǵýǵa siltep Kerch buǵazyn sheteldik kemeler úshin jaýyp tastady. Ýkraina kemeleri de osy buǵazdy paidalanatyn. Kiev Reseidiń bul sheshimin zańsyz dep atady.
