مامىردا ۇلىبريتانييا ۋكراينا مەن ناتو-داعى وداقتاستارىن قولداۋ ٷشٸن قارا تەڭٸزگە ەكٸ ەسكەري كەمەسٸن جٸبەرمەك. بۇل تۋرالى ٷكٸمەتتەگٸ دەرەككٶزٸنە سٸلتەي وتىرىپ Sunday Times حابارلادى, دەپ جازادى ازاتتىق.
جوسپارعا قاراعاندا, بوسفور بۇعازى ارقىلى قارا تەڭٸزگە قارۋلانعان ەسمينەتس ("دەرينگ" سەريياسىنان) پەن فرەگات ("ديۋك" سەريياسىنان) جولدانباق. ولارعا جەرورتا تەڭٸزٸنەن "كۆين ەليزابەت" اۆياتاسىمالداعىشى دەمەۋ كٶرسەتپەك.
ۇلىبريتانييا قورعانىس مينيسترلٸگٸنٸڭ ٶكٸلٸ بۇل اقپار تۋرالى پٸكٸر بٸلدٸرۋدەن باس تارتتى, بٸراق لوندون مەن ونىڭ وداقتاستارى "ۋكراينانىڭ ەگەمەندٸگٸ مەن اۋماقتىق تۇتاستىعىن" قولدايدى دەدٸ.
وسىعان دەيٸن قارا تەڭٸزگە اقش-تىڭ ەكٸ ەسمينتسٸ جٸبەرٸلەدٸ دەگەن حابار تاراعان. بٸراق Sunday Times باسىلىمىنىڭ جازۋىنشا, اقش پرەزيدەنتٸ دجو بايدەن رەسەيمەن قارىم-قاتىناستى ۋشىقتىرماۋ ٷشٸن بۇل جوسپاردان باس تارتقان. تٷرٸك باسىلىمدارىنىڭ حابارلاۋىنشا, اقش بوسفور بۇعازى ارقىلى كەمە ٶتكٸزۋگە دەگەن ٶتٸنٸشٸن قايتارىپ العان. ۆاشينگتون قارا تەڭٸزگە كەمە جٸبەرۋ جوسپارى تۋرالى پٸكٸر بٸلدٸرمەدٸ.
رەسەي ۋكراينامەن قارىم-قاتىناسى ۋشىققان تۇستا قارا تەڭٸزدە ەسكەري-تەڭٸز فلوتىنىڭ بٸر بٶلٸگٸن ۇستاپ وتىر. مەسكەۋدٸڭ ايتۋىنشا, وندا قازٸر ەسكەري جاتتىعۋلار ٶتٸپ جاتىر. رەسەي ەسكەري جاتتىعۋعا سٸلتەپ كەرچ بۇعازىن شەتەلدٸك كەمەلەر ٷشٸن جاۋىپ تاستادى. ۋكراينا كەمەلەرٸ دە وسى بۇعازدى پايدالاناتىن. كيەۆ رەسەيدٸڭ بۇل شەشٸمٸن زاڭسىز دەپ اتادى.
