Ulybritaniia parlamentinde Qazaqstanǵa sanktsiia salý usynysy aitylǵannan keiin osy memlekettiń Qazaqstandaǵy elshisi Syrtqy ister ministrligine shaqyrtylǵan. Bul týraly Qazaqstan Respýblikasy Syrtqy ister ministriniń birinshi orynbasary Shahrat Nuryshev málim etti, dep habarlaidy "Ult aqparat".
Májiliste tilshiler oǵan Qazaqstanǵa qatysty sanktsiialar týraly suraq qoidy.
«Ulybritaniianyń parlamentinde bir depýtat sondai málimdeme jasaǵan. Biz Resei men Ýkraina arasyndaǵy qarama-qaishylyqtarǵa tikelei qatysyp otyrǵan tarap emespiz. Sondyqtan atalǵan ýáj bizge túsiniksiz. Biz búgin Ulybritaniianyń elshisin Syrtqy ister ministrligine shaqyrdyq. Osy oraida ol bizge tolyq túsindirme berýi tiis», - dedi Shahrat Nuryshev.
Osy oraida ol Qazaqstan jaǵy barlyq memleketpen túsindirme jumysyn júrgizip jatqanyn atap ótti.
«Syrtqy ister ministrligi ótkizetin is-sharalardy qadaǵalasańyz, ministr shetelge belsendi túrde shyǵatynyn baiqaisyzdar. Túrli alańdarda - BUU-da, adam quqyqtary jónindegi keńeste sóz sóileidi. Elimizdiń jaǵdaiy týraly tolyq aqparat berip otyrǵanymyzdy kórip otyrsyzdar», - dedi Nuryshev.
Aita keteiik, 1 naýryzda Ulybritaniia parlamentiniń múshesi Margaret Hodj Ulybritaniia SIM basshysynan "Pýtindi qoldaityn" Qazaqstan men Ázerbaijanǵa qarsy sanktsiialar qarastyrylyp jatyr ma dep surady.
Seisenbi kúni onyń málimdemesine jaýap bergen Ulybritaniia syrtqy ister ministri Elizabet Trass Nur-Sultan men Bakýǵa sanktsiia salý máselesin qarastyryp jatqanyn, degenmen qazir London negizinen Resei men Belarýstiń Ýkrainaǵa agressiiasyna tótep berýge kóbirek den qoiyp jatqanyn aitqan.
