Qaraǵandy oblysy Sátpaev qalasynyń turǵyny Botagóz Maqatova Siriiaǵa ketip, sonda mert bolǵan uly týraly aitty, dep habarlaidy QazAqparat tilshisi.
«Siriiada meniń ulym boldy. 2 jyl buryn qaza tapty. Qazir ol jerde meniń kelinim men úsh nemerem júr. Qazaqstanda 120 ana óziniń balalary sol jaqta júrgenin aitýda. 10 ananyń balalary men týystary qazir Siriiadan kelgenderdiń qatarynda. Meniń kelinim áli sonda. Kóptegen azamattar qazir ol jaqta qorshaýda qalyp otyr. Búgingi tańda olar sol qorshaýdan shyǵa almaýda. Bizge olardyń sol qorshaýdan shyqqany habarlanǵanymen, jetýi tiis jerge deiin jete almai jatqany aitylyp jatyr. Olar sol jerge jaiaý kele jatqan kórinedi. Qaqtyǵys oryn alyp jatqandyqtan, olar erkin shyǵa almai jatyr. Sebebi, aýmaqtardyń kóbinde minalar qoiylǵan», - deidi Botagóz Maqatova QR SIM-de ótken baspasóz máslihatynda.
Ol búgingi kúni kelini jáne nemerelerimen vatsap arqyly hbarlasyp otyrǵanyn aitady.
«Áý basta meniń ulym dindi tolyq túsinbegendikten sol jaqtan bir-aq shyqqan. Balalarynyń bul jerde túk qatysy joq. Sebebi, nemerelerim óziniń ata-anasymen ketip qalǵan. Biz solardy qaitarǵymyz keledi. Olardyń bári de Qazaqstan azamattary. Olardyń bári de dindi bilmegendikten ómirden adasyp ketkenin, osyndai jaiǵa tap bolǵanyn túsinip otyr», - deidi ol.
Sátpaev qalasynyń turǵyny ulynyń Siriiaǵa ketip qalatynyn ózi bilmegenin aitty.
«Ulym oqýǵa bara jatqanyn aitqan edi. Aqyry, jarty jyldan keiin Siriiada bolyp shyqty. Ulym 2012 jyly ketip qalǵan. Kolledjde úshinshi kýrsta oqyp júrgen kezi bolatyn. Ol menen tek namaz oqýǵa ruqsat surady. Biz ol kezde mundai jaǵdaimen betpe-bet keletinimizdi sezgen joq edik. Áý basta qarsy bolyp, bul qadamǵa áli jasyń sai kelmeidi destik. Armiiaǵa baryp kelgennen keiin kór dedik. Bálkim, ruqsat bergenimiz qate de bolǵan shyǵar, biraq men ony ózim jiti baqylap júrgen edim», - deidi Botagóz.
Onyń aitýynsha, uly bir dosymen birge Almatyǵa taýar alýǵa ketip qalǵan. Sol kúii oralmapty.
«Ulym sol jaqqa ketip qalǵannan keiin komitetke ony qaitarý týraly ótishin jazdym. Biraq, ol kezde qandai shara qoldaný kerektigin eshkim de bilmep edi. Ulymnyń sol jaqta Aqtóbeniń qyzyna (qazaq qyzyna) úilengenin bildim. 2016 jyly ulym qaitys boldy. Qandai jaǵdai bolǵanyn bilmeimin. Áieli onyń jerlenip jatqany túsirilgen videony jiberdi. Ol jaqta soǵys bolyp jatqanda men qalaisha ony alyp keter edim...», - deidi Botagóz.
Eske sala ketsek, keshe Memleket basshysy Nursultan Nazarbaev Siriiadan Qazaqstan azamattaryn evakýatsiialaý boiynsha gýmanitarlyq operatsiiaǵa bailanysty málimdeme jasaǵan bolatyn. Memleket basshysy atap ótkendei, 6 qańtarda quqyq qorǵaý organdary men Syrtqy ister ministrligi júrgizgen gýmanitarlyq shara nátijesinde Siriiadan Qazaqstannyń 47 azamaty, sonyń ishinde 30 bala elge qaitaryldy.
Sonymen birge, búgingi baspasóz máslihatynda QR Syrtqy ister vitse-ministri Erjan Ashyqbaev «Jýsan» operatsiiasynan keiin de qaqtyǵys aimaqtarynda júrgen qazaqstandyqtardy Otanyna qaitarý jumystary jalǵasatynyn habarlady.
